- २३ बैशाख २०८३, बुधबार / May 6, 2026
पोखरामा नक्कली लाइसेन्स वितरण प्रकरण सार्वजनिक
प्रशासन अधिकृतसहित तीन जनाविरुद्ध भ्रष्टाचार मुद्दा दायर
झुट्टा विवरण राखेर पुरानो लाइसेन्स नम्बर प्रयोग गरिएको पुष्टि
गलत अभिलेखका आधारमा लाइसेन्सको प्रतिलिपि जारी गरिएको
अख्तियारले विशेष अदालतमा आरोपपत्र दायर गर्यो
काठमाडौँ, २७ चैत्र । अख्तियार दुरुपयोग अनुसन्धान आयोगले पोखरा स्थित यातायात व्यवस्था कार्यालयमा नक्कली सवारी चालक अनुमतिपत्र (लाइसेन्स) वितरण गरी अनियमितता गरेको ठहर गर्दै तत्कालीन कर्मचारीहरू विरुद्ध विशेष अदालत मा भ्रष्टाचार मुद्दा दायर गरेको छ।
अख्तियारका अनुसार यातायात व्यवस्था कार्यालय कास्की जिल्ला का तत्कालीन प्रशासन अधिकृत (आठौँ तह) शंकर थापा र तत्कालीन कम्प्युटर अपरेटर जगत ढकाल ले गलकोट नगरपालिका–२ का हिमबहादुर बस्नेत थापा सँग मिलेमतो गरी सरकारी अभिलेख सच्याएको पुष्टि भएको छ।
उनीहरूले कहिल्यै जारी नै नभएको पुरानो लाइसेन्स नम्बर (डीएल ०८–४२४८२) लाई आधार बनाई सरकारी विद्युतीय अभिलेखमा गैरकानुनी रूपमा विवरण थपघट गरेका थिए।
अनुसन्धानका क्रममा बस्नेतको नाममा ‘ए’ र ‘बी’ वर्गको लाइसेन्स २० वर्षअघि नै जारी भएको देखाउन २०५८ साल चैत २७ गते को इस्यु डेट र २०७८ साल चैत २२ गते को एक्स्पायरी डेट राखेर झुट्टा विवरण प्रविष्ट गरिएको भेटिएको छ। त्यही गलत विवरणका आधारमा २०७८ चैत १५ गते लाइसेन्सको प्रतिलिपि समेत जारी गरिएको खुलेको छ।
सरकारी कागजात र विद्युतीय अभिलेख सच्याएर भ्रष्टाचार गरेको पुष्टि भएपछि अख्तियारले प्रशासन अधिकृत थापा, कम्प्युटर अपरेटर ढकाल र सेवाग्राही बस्नेतलाई प्रतिवादी बनाउँदै सजायको मागदाबीसहित शुक्रबार विशेष अदालतमा आरोपपत्र दायर गरेको हो।
अख्तियारका अनुसार कार्यालयको गोप्य विवरण र अभिलेखमा अनाधिकृत पहुँच पुर्याई व्यक्तिगत लाभका लागि लाइसेन्स वितरण गर्ने कार्यले सुशासनमाथि गम्भीर प्रहार गरेको ठहर गरिएको छ।
