- २८ जेष्ठ २०८३, बिहीबार / Jun 11, 2026
काठमाडौँ, २८ जेठ । देशका विभिन्न भागमा निरन्तर वर्षा, बाढी, पहिरो तथा सडक मर्मत कार्यका कारण मुख्य राजमार्गहरू प्रभावित भएका छन्। नेपाल प्रहरीको पछिल्लो विवरणअनुसार केही सडक खण्ड पूर्ण रूपमा बन्द रहेका छन् भने कतिपय स्थानमा एकतर्फी मात्र सवारी सञ्चालन भइरहेको छ।
काठमाडौँ र मकवानपुर जोड्ने दुई महत्त्वपूर्ण वैकल्पिक सडक मर्मत कार्यका लागि एक महिनासम्म बन्द रहने भएका छन्। काठमाडौँको चन्द्रागिरी नगरपालिका–९ स्थित सतुङ्गल–चित्लाङ सडक खण्ड तथा मकवानपुरको इन्द्रसरोवर गाउँपालिकामा पर्ने कुलेखानी–फाखेल–हुमाने–फर्पिङ सडक खण्ड मर्मत भइरहेकाले सवारी आवागमन पूर्ण रूपमा रोकिएको हो।
त्यसैगरी, बीपी राजमार्ग अन्तर्गत काभ्रेपलाञ्चोकको खुर्कोट–नेपालथोक–कटुञ्जेबेंसी सडक खण्डमा सम्भावित बाढीको जोखिमका कारण सवारी सञ्चालनमा रोक लगाइएको छ।
कोशी प्रदेशका भोजपुर र पाँचथर जिल्लामा बाढीका कारण मध्य पहाडी लोकमार्ग प्रभावित भएको छ। भोजपुर नगरपालिका–५ बोखिम तथा पाँचथरको याङवरक गाउँपालिका–२ दोभान क्षेत्रमा सडकमा क्षति पुगेपछि हाल एकतर्फी मात्र यातायात सञ्चालन भइरहेको छ। भोजपुर क्षेत्रमा वैकल्पिक मार्गसमेत प्रयोग गर्न सकिने बताइएको छ।
यता, लुम्बिनी प्रदेशको रोल्पा जिल्लामा पहिरोका कारण सहिद राजमार्ग पूर्ण रूपमा अवरुद्ध भएको छ। परिवर्तन गाउँपालिका–१ बाङ्गास्थित सडक खण्डमा गएको पहिरो हटाउने प्रयास जारी रहे पनि यातायात सेवा सञ्चालन हुन सकेको छैन। प्रहरीले वर्षायाममा यात्रा गर्नुअघि सडकको अवस्थाबारे जानकारी लिएर मात्र यात्रा गर्न तथा आवश्यक सतर्कता अपनाउन सर्वसाधारणलाई आग्रह गरेको छ।
