- २५ भाद्र २०८३, बिहीबार / Sep 10, 2026
काठमाडौं, २५ भदौ । बजारमा ग्यासको अभाव कायमै रहे पनि नेपाल एलपी ग्यास उद्योग संघले मागअनुसार आपूर्ति भइरहेको दाबी गरेको छ ।संघले भूकम्प, नाकाबन्दी तथा कोभिड महामारीजस्ता विपत्तिका समयमा समेत ग्यास उद्योगहरूले आपूर्ति व्यवस्था सहज बनाउँदै आएको जनाएको छ ।
पृथ्वी राजमार्गअन्तर्गत कृष्णभीरमा सडक अवरुद्ध भएपछि ग्यास बोकेका बुलेट काठमाण्डौ आउन नसक्दा आपूर्ति प्रभावित भएको थियो । त्यसपछि नेपाल आयल निगमको निर्देशनअनुसार काठमाण्डौ, काभ्रे र धादिङमा रहेका ग्यास उद्योगका सिलिन्डरलाई बारा, पर्सा, चितवन, धनुषा, नवलपरासीलगायतका जिल्लामा रहेका उद्योगमा भरेर काठमाण्डौ उपत्यकामा ल्याउने व्यवस्था गरिएको संघले जनाएको छ ।
संघका अनुसार विपत्तिको समयमा आपूर्ति व्यवस्थालाई सहज बनाउन वैकल्पिक माध्यमबाट ग्यास ल्याउने काम भइरहेको छ । उद्योगीले बजारमा मागअनुसारकै ग्यास पठाइरहेको दाबी गरेका छन् । संघले उपभोक्तालाई पनि आवश्यकताअनुसार मात्रै ग्यास खरिद गर्न र अनावश्यक रूपमा सञ्चय नगर्न आग्रह गरेको छ । उपभोक्ताले बढी मात्रामा ग्यास सञ्चय गर्दा बजारमा कृत्रिम अभाव थप बढ्न सक्ने संघको भनाइ छ ।
तर उद्योगीले आपूर्ति भइरहेको दाबी गरे पनि बजारमा भने उपभोक्ताले सहज रूपमा ग्यास पाउन सकेका छैनन् । लामो समयदेखि देखिएको ग्यास अभावलाई पछिल्लो समय देशका विभिन्न क्षेत्रमा आएको विपत्तिले थप जटिल बनाएको छ । भदौ १४ गते कृष्णभीरमा सडक भासिएपछि ग्यास बोकेका सवारीसाधनको नियमित आवागमन प्रभावित भएको थियो । त्यसपछि वैकल्पिक मार्गबाट ग्यास ल्याउने प्रयास भए पनि उपभोक्तासम्म पर्याप्त मात्रामा ग्यास पुग्न नसकेको अवस्था छ ।
ग्यास अभाव व्यवस्थापनका विषयमा उद्योगमन्त्रीले उद्योगी तथा कर्मचारीका कारण समस्या उत्पन्न भएको दाबी गर्दै आउनुभएको छ । तर उद्योगीहरूले भने आफूहरूले आपूर्ति व्यवस्था निरन्तर सञ्चालन गरिरहेको बताएका छन् । यसरी उद्योगीले आपूर्ति सहज रहेको दाबी गरिरहँदा उपभोक्ताले भने बजारमा ग्यास नपाएको गुनासो गरिरहेका छन् । आपूर्ति र वितरणबीच देखिएको यही समस्या समाधान गर्न सरकारमाथि थप दबाब परेको छ ।
