- २० श्रावण २०८३, बुधबार / Aug 5, 2026
रौतहट। गौर मा शुक्रबार दुई समुदायबीच झडप भएको छ। गौर नगरपालिका–६ सबगढामा बिहीबार जन्तीमाथि ढुंगामुढा प्रहार गरिएको आरोपपछि शुक्रबार दुवै पक्षबीच तनाव बढ्दै झडप भएको हो। प्रमुख जिल्ला अधिकारी दिनेशसागर भुसालका अनुसार जन्तीको विषयलाई लिएर उत्पन्न विवादले उग्र रूप लिएको हो।
स्थानीयका अनुसार बिहीबारको घटनाको विरोधमा शुक्रबार दुवै समुदायका युवा आमनेसामने भएपछि अवस्था तनावग्रस्त बनेको थियो। स्थिति नियन्त्रणबाहिर जान नदिन ठूलो संख्यामा प्रहरी परिचालन गरिएको जिल्ला प्रहरी कार्यालय रौतहट ले जनाएको छ।
झडपका क्रममा केही सर्वसाधारण तथा प्रहरी घाइते भएका छन्। घाइतेहरूको स्थानीय स्वास्थ्य संस्थामा उपचार भइरहेको प्रहरीले जानकारी दिएको छ।
जिल्ला प्रशासन कार्यालय रौतहट ले सर्वसाधारणलाई संयमित रहन र अफवाहमा नलाग्न आग्रह गरेको छ। प्रमुख जिल्ला अधिकारी भुसालले अवस्था क्रमशः सामान्य हुँदै गएको दाबी गर्दै दुवै पक्षसँग छलफल गरी स्थिति नियन्त्रणमा लिने प्रयास भइरहेको बताएका छन्।
