- ११ भाद्र २०८३, बिहीबार / Aug 27, 2026
काठमाडौँ, ११ भदाै । संस्कृति, पर्यटन तथा नागरिक उड्डयन मन्त्रालयले गोसाइँकुण्ड पुगेका आन्तरिक तथा विदेशी पर्यटकलाई धुन्चेतर्फको नियमित सडकमार्ग प्रयोग नगर्न आग्रह गरेको छ ।
रसुवामा आएको विनाशकारी बाढीका कारण सडक तथा यातायात प्रभावित भएकाले मन्त्रालयले पर्यटकको सुरक्षालाई ध्यानमा राख्दै अर्को सूचना जारी नभएसम्म नियमित मार्ग प्रयोग नगर्न सचेत गराएको हो ।
मन्त्रालयका अनुसार गोसाइँकुण्डबाट काठमाडौं फर्किने पर्यटकले गोसाइँकुण्ड–दुप्चेश्वर–काठमाडौं हुँदै वैकल्पिक मार्ग प्रयोग गर्न सक्नेछन् । बाढीपहिरोका कारण नियमित सडकमार्गमा जोखिम हुन सक्ने भएकाले पर्यटकलाई सुरक्षित यात्रा गर्न र सम्बन्धित निकायको सूचनाअनुसार मात्रै यात्रा गर्न मन्त्रालयले आग्रह गरेको छ ।
मन्त्रालयले पर्यटकको आवागमन तथा सुरक्षाको अवस्थालाई निरन्तर निगरानी गरिरहेको जनाएको छ । परिस्थितिमा सुधार आएपछि नियमित मार्ग सञ्चालनबारे थप सूचना जारी गरिनेछ ।
