- २९ श्रावण २०८३, शुक्रबार / Aug 14, 2026
नयाँ आर्थिक वर्षसँगै सरकारी कर्मचारीको संशोधित तलबमान लागू।
सुरु तलब स्केलमा १० प्रतिशत वृद्धि।
कार्यसम्पादनमा आधारित थप १० प्रतिशत प्रोत्साहन भत्ताको व्यवस्था।
न्यूनतम तलब करिब ४० हजार र उच्च तहमा १ लाख रुपैयाँभन्दा बढी।
महँगी भत्तालाई पनि निरन्तरता।
काठमाडौँ, १ साउन । नयाँ आर्थिक वर्ष २०८३/८४ सुरु भएसँगै राष्ट्रसेवक कर्मचारीहरूको संशोधित तलबमान आजदेखि कार्यान्वयनमा आएको छ। सरकारले कर्मचारीको मनोबल बढाउने र बढ्दो महँगीको प्रभाव कम गर्ने उद्देश्यले तलबमा उल्लेख्य वृद्धि गरेको हो।
अर्थमन्त्री स्वर्णिम वाग्लेले जेठ १५ गते प्रस्तुत गरेको बजेटमार्फत कर्मचारीको सुरु तलब स्केलमा १० प्रतिशत वृद्धि गरिएको घोषणा गरेका थिए। पछिल्ला चार वर्षदेखि तलब पुनरावलोकन नभएको अवस्थालाई ध्यानमा राख्दै सरकारले महँगी भत्तालाई पनि यथावत् कायम राखेको छ।
बजेटअनुसार कार्यसम्पादनमा आधारित पारिश्रमिक प्रणालीको सुरुवात गर्दै थप १० प्रतिशत मासिक प्रोत्साहन भत्ताको व्यवस्था पनि लागू गरिएको छ।
सरकारका अनुसार तलब वृद्धि, महँगी भत्ता तथा प्रोत्साहन भत्तासहित कर्मचारीले पाउने कुल पारिश्रमिकमा करिब २१ प्रतिशतसम्म वृद्धि हुने भएको छ।
नयाँ व्यवस्थापछि निजामती, नेपाली सेना, नेपाल प्रहरी, सशस्त्र प्रहरी, शिक्षक तथा अन्य राष्ट्रसेवक कर्मचारीको ग्रेडसहितको न्यूनतम मासिक तलब करिब ४० हजार रुपैयाँ पुगेको छ भने उच्च तहका कर्मचारीको मासिक तलब १ लाख रुपैयाँभन्दा बढी हुने भएको छ।
सरकारले कार्यसम्पादनमा आधारित प्रोत्साहन प्रणालीमार्फत सार्वजनिक सेवामा दक्षता, उत्तरदायित्व र सेवा प्रवाहको गुणस्तर सुधार गर्ने लक्ष्य राखेको जनाएको छ।
