- २३ आश्विन २०८३, शुक्रबार / Oct 9, 2026
गुल्मी, १० फागुन । गुल्मीस्थित रेसुङ्गा विमानस्थलमा अबदेखि सातामा तीनपटक मात्र हवाई उडान हुने भएको छ ।
नेपाल वायुसेवा निगमले यसअघि सञ्चालन गर्दै आएको साप्ताहिक चार उडानको तालिका परिवर्तन गर्दै बिहीबारको उडान कटौती गरेको हो । अब आइतबार , मङ्गलबार र शनिबार मात्र उडान हुने रेसुङ्गा विमानस्थलका स्टेसन प्रमुख सुमन थापाले जानकारी दिए । निगमसँग हाल तीन वटा मात्र ट्वीनअटर जहाज उपलब्ध रहेका छन् । जहाजको नियमित मर्मत तथा अभावका कारण अस्थायी रूपमा उडान तालिकामा परिवर्तन गरिएको बताइएको छ ।
रेसुङ्गा विमानस्थलमा १८ सिट क्षमताको ट्वीनअटर जहाजबाट काठमाडौँदेखि बिहान ६ः३० बजे र गुल्मीबाट बिहान ७ः३० बजे उडान हुँदै आएको छ । काठमाडौँदेखि गुल्मीका लागि रु ७ हजार ५०० र गुल्मीदेखि काठमाडौँका लागि रु ७ हजार ३०० भाडादर कायम गरिएको छ । दिउँसो अत्यधिक हावाको चाप हुने भएकाले प्राविधिक कारणले बिहानको समयमा मात्र उडान हुने गरेको छ ।
जिल्लामा २०८० वैशाख २९ गतेदेखि व्यावसायिक हवाई सेवा सुरु भएपछि आन्तरिक तथा बाह्य पर्यटकको आगमन बढेको छ । लामो स्थलमार्गको विकल्पका रूपमा ४५ मिनेटमै राजधानी पुग्न सकिने सुविधा भए पनि उडान सङ्ख्या घटेसँगै यात्रुहरू प्रभावित बनेका छन् ।
