- २५ आश्विन २०८३, आईतवार / Oct 11, 2026
एजेन्सी । इरानका विभिन्न विश्वविद्यालयहरूमा विद्यार्थीहरूले पुनः सरकारविरोधी प्रदर्शन सुरु गरेका छन् ।
राजधानी तेहरानस्थित शरिफ प्राविधिक विश्वविद्यालय र अमिर कविर प्राविधिक विश्वविद्यालयमा हजारौँ विद्यार्थीले ‘तानाशाही अन्त्य गर’ भन्दै नाराबाजी गरेका छन् । गत महिनाको हिंसात्मक दमनमा ज्यान गुमाएका प्रदर्शनकारीहरूको सम्झनामा नयाँ शैक्षिक सत्र सुरु भएसँगै आन्दोलन फेरि चर्किएको बताइएको छ । तेहरानका साथै मशहद लगायतका सहरमा पनि विद्यार्थीहरूले आफ्नो अधिकारको माग गर्दै आन्दोलन जारी राखेका छन् । केही स्थानमा प्रदर्शनकारी र सरकार समर्थकबीच झडपसमेत भएको छ ।
यसबीच इरान र संयुक्त राज्य अमेरिकाबीचको सैन्य तनाव उत्कर्षमा पुगेको छ । अमेरिकी राष्ट्रपति डोनाल्ड ट्रम्पले इरानमाथि सीमित सैन्य कारबाहीको चेतावनी दिएका छन् । इरानले आणविक हतियार निर्माण गर्न खोजेको आशंकामा अमेरिका र युरोपेली राष्ट्रहरूले सैन्य उपस्थिति बढाएका हुन् । यद्यपि स्विट्जरल्याण्डमा भएको दुईपक्षीय वार्तामा आणविक कार्यक्रम नियन्त्रण गर्ने विषयमा केही प्रगति भएको जनाइएको छ ।
मानवअधिकारवादी संस्थाहरूका अनुसार पछिल्लो प्रदर्शनका क्रममा ६ हजारभन्दा बढी मानिसको मृत्यु भएको दाबी गरिएको छ ।
