अमेरिकाले इरानका सर्त माने हर्मुज जलमार्ग खुल्न सक्ने संकेत

मुख्य  बुँदा

एजेन्सी । इरानले हर्मुज जलमार्ग पुनः खोल्ने सम्भावना रहेको जनाएको छ । इरानका विदेशमन्त्री अब्बास अराघचीका अनुसार यस विषयमा कतारको मध्यस्थतामा वार्ता भइरहेको छ ।

तर, हर्मुज जलमार्ग खोल्ने योजना अमेरिकाले तेहरानले राखेका सर्त स्वीकार गरेमा मात्र अघि बढ्ने उहाँको भनाइ छ । यसले अमेरिका र इरानबीच कूटनीतिक संवादको सम्भावना बढेको संकेत गरेको छ । यसैबीच, इरानका सुरक्षा प्रमुख मोहसेन रेजाईले अमेरिकी उपराष्ट्रपति जेडी भान्सले पठाएको पत्र आफूले समीक्षा गरेको बताउनुभएको छ । पत्रमा अमेरिकाको वार्ता शैलीमा केही परिवर्तन देखिएको र त्यसलाई इरानले सकारात्मक रूपमा लिएको अलजजिराले जनाएको छ ।

अमेरिकी विदेशमन्त्री मार्को रुबियोले पनि राष्ट्रपति डोनाल्ड ट्रम्पले इरानमाथि थप सैन्य आक्रमण गर्ने विषयमा कुनै निर्णय नगरेको बताउनुभएको छ । उहाँका अनुसार ट्रम्प सैन्य विकल्पभन्दा कूटनीतिक माध्यमबाट समस्या समाधान गर्न प्राथमिकता दिइरहनुभएको छ । यद्यपि, इरानका सर्वोच्च नेता मोज्तबा खामेनीले अमेरिकी तथा इजरायली सम्भावित खतराको जवाफ दिन आफ्ना सैन्य कमान्डरहरूलाई निर्देशन दिएको खबरमा उल्लेख छ । यसले वार्ताको सम्भावना देखिए पनि क्षेत्रीय सैन्य सतर्कता र तनाव कायमै रहेको देखाउँछ ।

हर्मुज जलमार्ग पुनः सञ्चालन हुने वा नहुने विषय आगामी वार्ताको परिणाममा निर्भर रहनेछ । विश्वको महत्वपूर्ण ऊर्जा ढुवानी मार्गमध्ये एक मानिने यस जलमार्गको अवस्थाले मध्यपूर्वको सुरक्षा र अन्तर्राष्ट्रिय ऊर्जा आपूर्तिमा प्रत्यक्ष प्रभाव पार्न सक्छ ।