मुस्ताङमा पुनः गयो हिउँपहिरो, बोक्सीखोला थुनियो

म्याग्दी । मानापाथी हिमालबाट मंगलबार साँझ पुनः हिउँपहिरो खसेको छ। थासाङ गाउँपालिका–२ स्थित मूलखर्कमा यही भदौ ७ गते अपराह्न पनि हिउँ पहिरो खसेको थियो ।

हिउँपहिरोले बोक्सीखोला पूर्ण रूपमा थुनिएको वडा अध्यक्ष एवं थासाङ गाउँकार्यपालिकाका प्रवत्ता गौतम शेरचनले बताए । बोक्सीखोला कालीगण्डकीको सहायक नदी हो ।

आसपासमा बस्ती नभए पनि बेनी–जोमसोम सडक बोक्सीखोलामा पर्दछ । यसअघि विसं २०७८ कात्तिक २८ र फागुन २१ गते थासाङ गाउँपालिका–२ कोवाङमा टुकुचे हिमालबाट आएको हिमपहिरोले १५० भन्दाबढी चौँरीगाई मरेका थिए ।