चुनाव स्वच्छ, निष्पक्ष र भयरहित बनाउन निर्देशन

काठमाण्डौ, २१ माघ । गृह मन्त्रालयले प्रतिनिधिसभा सदस्य निर्वाचनलाई स्वच्छ, निष्पक्ष र भयरहित वातावरणमा सम्पन्न गराउने सन्दर्भमा प्राप्त जिम्मेवारीअनुसार कार्यसम्पादन गर्न निर्देशन दिएको छ।

सचिव राजकुमार श्रेष्ठको अध्यक्षतामा ७७ वटै जिल्लाका प्रमुख जिल्ला अधिकारीहरूको सहभागितामा भएको बैठकले प्रतिनिधिसभा सदस्य निर्वाचन एकीकृत सुरक्षा योजना, २०८२ प्रभावकारी रूपमा कार्यान्वयन गर्न निर्देशन दिएको हो।

गृहमन्त्रालयका प्रवक्ता आनन्द काफ्लेले जानकारी दिनुभएको अनुसार बैठकमा शान्ति सुरक्षाको अवस्था, निर्वाचन आचारसंहिताको कार्यान्वयन, मतदानस्थलको अनुगमन, मतदानस्थलमा खटिने निर्वाचन प्रहरी र कर्मचारीको व्यवस्थापन, आवश्यक सवारीसाधन तथा मतपेटिका ढुवानी व्यवस्थालगायत विषयमा विस्तृत छलफल भएको थियो।

बैठकमा सीमा सुरक्षामा उच्च सतर्कता अपनाउने, छिमेकी देशका समकक्षी निकायसँग आवश्यक समन्वयात्मक बैठक गर्ने, धार्मिक सहिष्णुता तथा सामाजिक सद्भाव कायम गर्ने, सामाजिक सञ्जालको दुरुपयोग नियन्त्रण गर्ने तथा जिल्ला सुरक्षा समितिलाई दिइएका निर्देशनको प्रभावकारी कार्यान्वयन सुनिश्चित गर्ने विषयमा पनि छलफल गरिएको थियो।