बुढानीलकण्ठ–१३ चुनीखेल नयाँबस्तीमा आगलागी

काठमाण्डौ, २१ माघ । काठमाण्डौको बुढानीलकण्ठ नगरपालिका–१३ चुनीखेल नयाँबस्तीमा आगलागी भएको छ। गएराति पौने ११ बजेतिर शुरू भएको आगो निभाउन झन्डै तीन घण्टा लागेको थियो।

काठमाण्डौ महानगरपालिका, बुढानीलकण्ठ नगरपालिका र टोखा नगरपालिकाको दमकलको सहयोगमा आगो नियन्त्रणमा लिइएको हो। आगो लागेलगत्तै सात जनाको उद्धार गरिएको थियो।

आगलागीका कारण २४ परिवार विस्थापित भएका छन्। आगोले लामो टहरा र त्यहाँ रहेका सरसामान जलेर नष्ट भएको वडाअध्यक्ष टीकानारायण श्रेष्ठले जानकारी दिनुभयो। उहाँका अनुसार विस्थापित परिवारलाई नजिकैका अन्य टहरामा अस्थायी रूपमा राखिएको छ।

विस्थापितहरूलाई खाद्यान्न, लत्ताकपडा लगायतका राहत सामग्री उपलब्ध गराउने तयारी भइरहेको छ। प्रारम्भिक रूपमा बिजुली सट भएर आगलागी भएको अनुमान गरिएको भए पनि आगलागीबाट भएको क्षतिको यकिन विवरण भने आइसकेको छैन।