- १५ जेष्ठ २०८३, शुक्रबार / May 29, 2026
काठमाडाैं, ११ असार । इरानमा अमेरिकी सेनाले हालै गरेको आक्रमणपछि अमेरिकी गुप्तचर निकायको प्रारम्भिक मूल्याङ्कनले उक्त आक्रमणबाट इरानको परमाणु कार्यक्रम पूर्ण रूपमा नष्ट नभएको निष्कर्ष निकालेको छ । यो मूल्याङ्कन अमेरिकी रक्षा मन्त्रालयअन्तर्गतको डिफेन्स इन्टेलिजेन्स एजेन्सी (DIA) ले तयार पारेको हो ।
गुप्तचर स्रोतहरूका अनुसार, आक्रमणले इरानको संवर्धित युरेनियम भण्डारलाई खासै क्षति पुर्याएको छैन र सेन्ट्रीफ्युजहरू पनि धेरै हदसम्म सुरक्षित छन् । एक गुप्त स्रोतले भने, “इरानलाई बढीमा केही महिनासम्म मात्र पछाडि धकेल्न सकियो ।”
तर यो मूल्याङ्कन ट्रम्प प्रशासनको दाबीहरूसँग मेल खाँदैन । अमेरिकी राष्ट्रपति डोनाल्ड ट्रम्प र रक्षामन्त्री पिट हेगसेथले आक्रमणबाट इरानको परमाणु पूर्वाधार ‘पूर्ण रूपमा ध्वस्त’ भएको दाबी गरेका थिए । यसैबीच ह्वाइट हाउसले उक्त मूल्याङ्कनको अस्तित्वलाई स्वीकार गर्दै त्यसलाई अस्वीकार गरेको छ । ह्वाइट हाउसकी प्रेस सेक्रेटरी क्यारोलिन लेभिटले सीएनएनलाई दिएको प्रतिक्रिया अनुसार, मूल्याङ्कन लिक गर्नु ट्रम्पलाई बदनाम गर्न गरिएको योजनाबद्ध प्रयास भएकाे बताइन् । उनले भनेकी छन्, “३०,००० पाउन्डका १४ वटा बमहरू जब लक्षित स्थानमा खसालिन्छन्, त्यहाँ पूर्ण विनाश हुन्छ भन्ने सबैलाई थाहा छ ।”
हाल मूल्याङ्कन प्रक्रिया अझै जारी छ र अन्तिम निष्कर्ष आउन बाँकी रहेको अमेरिकी गुप्तचर निकायहरूले जनाएका छन् ।
