- २६ असार २०८३, शुक्रबार / Jul 10, 2026
काठमाडाैं, १४ जेठ । इजरायलले दक्षिणी लेबनानमा ठूलो सैन्य कारबाही सुरु गर्ने संकेतसँगै त्यहाँका बासिन्दालाई तत्काल क्षेत्र खाली गर्न निर्देशन दिएको छ । इजरायली सेनाले उक्त क्षेत्रलाई ‘युद्ध क्षेत्र’ घोषणा गर्दै नयाँ आक्रमणको चेतावनी दिएको हो ।
इजरायल रक्षा बल (आईडीएफ) ले दक्षिणी लेबनानका नागरिकलाई जहरानी नदीको उत्तरतर्फ सर्न आग्रह गरेको छ । उक्त नदी इजरायली सीमाबाट करिब ४० किलोमिटर दूरीमा पर्छ । आईडीएफले हेजबुल्लाहविरुद्ध ‘कडा सैन्य कदम’ चालिने चेतावनी दिएको छ । इजरायलले हेजबुल्लाहले पटक पटक युद्धविराम उल्लङ्घन गरेको आरोप लगाएको छ ।
अप्रिल १७ मा लागू गरिएको युद्धविरामपछि यो सबैभन्दा ठूलो सैन्य आदेश मानिएको छ । अन्तर्राष्ट्रिय सञ्चारमाध्यमका अनुसार यस कदमले लेबनानको करिब १४ प्रतिशत भूभाग प्रत्यक्ष प्रभावित हुने अनुमान गरिएको छ । यसअघि बुधबार इजरायलले दक्षिणी सहर टायरमा हवाई आक्रमण गरेको थियो । त्यसपछि दुवै पक्षबीच तनाव झन् बढेको देखिएको छ ।
यता हेजबुल्लाहले पनि इजरायलमाथि युद्धविराम उल्लङ्घन गरेको आरोप लगाएको छ । समूहले आफ्ना लडाकु र इजरायली सेनाबीच झडप भएको दाबी समेत गरेको छ । इजरायली प्रधानमन्त्री बेन्जामिन नेतन्याहुले हेजबुल्लाहले दक्षिणी लेबनानमा रहेका सैनिक र उत्तरी इजरायलका नागरिकलाई लक्षित गर्दै ड्रोन आक्रमण गरेको आरोप लगाए ।
उनले त्यसपछि इजरायलले आफ्नो सैन्य अभियान अझ व्यापक बनाउने संकेत दिएका छन् । पछिल्ला घटनाक्रमले मध्यपूर्वमा फेरि ठूलो तनाव सिर्जना हुने चिन्ता बढाएको छ ।
