- २६ जेष्ठ २०८३, मंगलवार / Jun 9, 2026
काठमाडौं, १५ भदौ । इजरायली आक्रमणमा परी यमनका प्रधानमन्त्री अहमद गालिब अल-रहावी मारिएको यमनका हुथी विद्रोहीहरूले दाबी गरेका छन् । हुथीहरूको भनाइमा, गाजा युद्ध सुरु भएपछि यो उनीहरूको सबैभन्दा ठूलो क्षति हो । यस अवधिमा वरिष्ठ अधिकारीको मृत्यु भएको पहिलो घटना भएको उनीहरूको दाबी छ ।
समाचार एजेन्सी रोयटर्सले हुथी विद्रोहीहरूको समाचार एजेन्सीलाई उद्धृत गर्दै यमनी प्रधानमन्त्री मारिएको उल्लेख गरे पनि यो दाबीलाई स्वतन्त्रतापूर्वक पुष्टि गर्न नसकिएको बीबीसीले जनाएको छ । शनिबार हुथी विद्रोही समूहको सुप्रीम पोलिटिकल काउन्सिलका प्रमुख महदी अल-मशातले यमनी प्रधानमन्त्रीको मृत्यु भएको घोषणा गरेका थिए । बिहीबार राजधानी साना भएको आक्रमणबारे विस्तृत विवरण सार्वजनिक गरिएको छैन । तर आक्रमणमा अन्य केही व्यक्ति घाइते भएको बताइएको छ । एएफपीका अनुसार, अल-रहावीलाई अन्तिम पटक बुधबार सानामा एक सार्वजनिक कार्यक्रममा देखिएको थियो ।
हुथी विद्रोहीहरूले जारी गरेको वक्तव्यमा भनिएको छ, “हामी योद्धा अहमद गालिब नासिर अल-रहावीको मृत्युको घोषणा गर्छौं । उनका धेरै सहयोगीहरूसहित उनी मारिएका छन् । उनलाई इजरायलले निशाना बनाएको हो ।” वक्तव्यमा आक्रमणमा घाइते भएका केही सहयोगीहरू अहिले अस्पतालमा उपचाररत रहेको उल्लेख छ । यसअघि इजरायलले सानामा इरान समर्थित हुथी समूहका रक्षा मन्त्री, चीफ अफ स्टाफ र अन्य उच्च अधिकारीहरूलाई लक्षित गरेको बताएको थियो । तर रक्षा मन्त्री मारिएको बारेमा भने प्रष्ट जानकारी आएको छैन ।
अहमद अल-रहावी करिब एक वर्षअघि प्रधानमन्त्री बनेका थिए । तर सरकार सञ्चालनको मुख्य जिम्मेवारी उनका उप–प्रधानमन्त्री मोहम्मद मुफ्ताहले सम्हालिरहेका थिए ।
शनिबारदेखि मुफ्ताहलाई कार्यवाहक प्रधानमन्त्रीको जिम्मेवारी दिइएको छ ।
