लेबनानमा इजरायलको हवाई आक्रमण, एक बालकसहित सात जनाको मृत्यु

एजेन्सी । लेबनानमा इजरायलले हवाई आक्रमण गरेको छ । इजरायलको आक्रमणपछि लेबनानले जवाफमा इजरायलमा रकेट प्रहार गरेको हो । हवाई आक्रमणमा एक बालकसहित सात जना मारिएका र ४० जना घाइते भएको लेबनानको स्वास्थ्य मन्त्रालयले जनाएको छ ।

गएको नोभेम्बरमा युद्धविराम लागू भएपछि यो सबैभन्दा ठूलो हिंसा मानिएको छ । इजरायली सेनाले दक्षिणी लेबनानमा इरान समर्थित राजनीतिक समूह हिज्बुल्लाहका सेन्टरलाई निशाना बनाएको जनाएको छ ।

लेबनानका राष्ट्रपति जोसेफ औनले दक्षिणी लेबनानमा भएको इजरायली हवाई आक्रमणको निन्दा गरेका छन् । लेबनानको राष्ट्रपति कार्यालयले विज्ञप्ति निकालेर इजरायलले युद्धविराम सम्झौताको उल्लङ्घन गरी द्वन्द्व निम्त्याएको आरोप लगाएको छ ।

राष्ट्रपति जोसेफले लेबनानको ‘राष्ट्रिय हित’ लाई जोगाउन संयमता अपनाउन आह्वान गरेका छन् । लेबनानमा हिज्बुल्लाह र प्यालेस्टाइनी समूहसहित कयौँ सशस्त्र समूह सक्रिय छन् । हिज्बुल्लाहले आफू युद्धविराममा प्रतिवद्ध रहेको जवाफ दिएको छ ।