- ३१ श्रावण २०८३, आईतवार / Aug 16, 2026
काठमाडौं, ३१ साउन । कर्णाली नदीको अछामस्थित चितवन जलमापन केन्द्रमा जलसतहले सतर्कता तह पार गरेको छ ।
बाढी पूर्वानुमान महाशाखाले आइतबार बिहान ९ः०५ बजे सूचना जारी गर्दै कर्णाली नदीमा पानीको सतह अझै बढ्दो क्रममा रहेको जनाएको छ ।
महाशाखाले नदीको तल्लो तटीय क्षेत्र तथा आसपासका डुबान भइरहने स्थानका बासिन्दालाई आइतबार बेलुकासम्म उच्च सतर्कता अपनाउन आग्रह गरेको छ ।
जल तथा मौसम विज्ञान विभागका अनुसार हाल देशभर मनसुनी वायुको प्रभाव रहेको छ । मनसुनको न्यून चापीय रेखा पूर्वतर्फ सरदर स्थानको आसपास तथा पश्चिमतर्फ सरदर स्थानभन्दा उत्तर अर्थात् नेपालको नजिक रहेको विभागले जनाएको छ ।
हाल देशभर साधारणतया बादल लागेको छ । लुम्बिनी, कर्णाली र सुदूरपश्चिम प्रदेशका साथै गण्डकी प्रदेशमा वर्षा भइरहेको महाशाखाले जनाएको छ ।
कर्णाली नदीको जलसतह बढ्दो क्रममा रहेकाले तल्लो तटीय क्षेत्रका बासिन्दालाई नदीको अवस्था तथा बाढीसम्बन्धी सूचनामा ध्यान दिन र आवश्यक सावधानी अपनाउन आग्रह गरिएको छ ।
