- २६ आश्विन २०८३, सोमबार / Oct 12, 2026
काठमाडौं, १३ फागुन । काठमाडौं महानगरपालिकाको शिक्षा विभागले माध्यमिक शिक्षा परीक्षा (एसइई) को नतिजा सुधार गर्ने उद्देश्यले ‘विशेष कक्षा’ सञ्चालन सुरु गरेको छ । गत वर्ष एसइई परीक्षामा ५० प्रतिशतभन्दा कम विद्यार्थी उत्तीर्ण भएका विद्यालयलाई लक्षित गर्दै कार्यक्रम अघि बढाइएको हो ।
पहिलो चरणमा गीतामाता माध्यमिक विद्यालय, सरस्वती माध्यमिक विद्यालय, जुद्धोदय माध्यमिक विद्यालय, पद्मकन्या माध्यमिक विद्यालय, परोपकार माध्यमिक विद्यालय र गुह्ेश्वरी बालशिक्षा माध्यमिक विद्यालयमा कक्षा सुरु गरिएको शिक्षा विभाग प्रमुख नमराज ढकालले जानकारी दिए । यी विद्यालयका ५२३ विद्यार्थी विशेष कक्षामा सहभागी हुनेछन् ।
विषय विज्ञ, स्रोत शिक्षक तथा सेवानिवृत्त शिक्षकमार्फत कक्षा सञ्चालन गरिने जनाइएको छ । बाँकी पाँच विद्यालय—प्रभात माध्यमिक विद्यालय, नवयुग माध्यमिक विद्यालय, नेपाल आदर्श माध्यमिक विद्यालय, भक्त विद्याश्रम माध्यमिक विद्यालय र नन्दी रात्री माध्यमिक विद्यालयमा चैत ३ गतेपछि कक्षा सुरु गरिनेछ । त्यहाँ १०४ विद्यार्थी सहभागी हुनेछन् ।
कार्यवाहक प्रमुख सुनिता डंगोलले विद्यार्थीमा परीक्षाको डर हटाउँदै आत्मविश्वासका साथ परीक्षा दिन प्रेरित गर्न शिक्षकलाई आग्रह गरिन् । उत्तर लेख्ने सीप विकास र नतिजा सुधार कार्यक्रमको मुख्य उद्देश्य रहेको उनले बताइन् ।
यस वर्ष महानगरका सामुदायिक विद्यालयबाट करिब ४ हजार ५५७ विद्यार्थी एसइई परीक्षामा सहभागी हुँदैछन् । गत वर्ष ७८९ विद्यार्थीले ३.६१ देखि ४ जिपिए प्राप्त गरेका थिए, जसमा १७ जनाले ४ जिपिए ल्याएका थिए ।
