- २२ भाद्र २०८३, सोमबार / Sep 7, 2026
काठमाडौं, १३ फागुन । आसन्न निर्वाचनलाई लक्षित गर्दै नेपाल आयल निगम ले खाना पकाउने एलपी ग्यासको आयात बढाएको जनाएको छ । निर्वाचन अवधिमा बजारमा ग्यास अभाव हुन नदिन विशेष व्यवस्था मिलाइएको निगमको दाबी छ ।
निगमले भारतीय आपूर्तिकर्ता Indian Oil Corporation (आईओसी) बाट उच्च दरमा ग्यास लोडिङ गरिरहेको जनाएको छ ।
निगमका अनुसार मंगलबार यो वर्षकै सबैभन्दा बढी परिमाणमा ग्यास आयात गरिएको छ । एकै दिन १३८ बुलेट ग्यास लोड भएको र उक्त परिमाण करिब एक लाख ७३ हजार ८०० सिलिन्डर बराबर हुने जनाएको छ ।
निगमका कार्यकारी निर्देशक चण्डिका भट्टले निर्वाचन अवधिभर ग्यास आपूर्ति नियमित रहने बताउँदै उपभोक्तालाई ढुक्क रहन आग्रह गरेका छन् । बजारमा कृत्रिम अभाव सिर्जना हुन नदिन भण्डारण तथा वितरण प्रणालीलाई चुस्त बनाइएको निगमले जनाएको छ ।
