- ३० चैत्र २०८२, सोमबार / Apr 13, 2026
पूर्वप्रधानमन्त्री ओली पक्राउ
पूर्वगृहमन्त्री रमेश लेखक पनि नियन्त्रणमा
जेनजी आन्दोलनमा १९ जनाको मृत्यु प्रकरणमा अनुसन्धान
अपराध अनुसन्धान कार्यालयको टोलीद्वारा पक्राउ
हेलचेक्र्याईं गरी ज्यान मार्ने अभियोगमा अनुसन्धान
राजनीतिक प्रतिशोध कि कानुनी प्रक्रिया भन्ने बहस सुरु
काठमाडौँ, १४ चैत्र । केपी शर्मा ओली लाई प्रहरीले पक्राउ गरेको छ। उनलाई भक्तपुरको गुण्डुस्थित निवासबाट नियन्त्रणमा लिइएको हो। अपराध अनुसन्धान कार्यालय टेकुका एसएसपी सन्तोष खड्काको नेतृत्वमा गएको प्रहरी टोलीले ओलीलाई पक्राउ गरेको हो।
यसअघि नै पूर्वगृहमन्त्री रमेश लेखक लाई पनि भक्तपुरको कटुञ्जेस्थित निवासबाट नियन्त्रणमा लिइएको थियो। प्रहरीका अनुसार भदौ २३ गते भएको जेनजी आन्दोलनका क्रममा १९ जनाको ज्यान गएको घटनासम्बन्धी अनुसन्धानका लागि उनीहरूलाई पक्राउ गरिएको हो।
जाँचबुझ आयोगको प्रतिवेदनमा उनीहरूमाथि मुलुकी अपराध संहिता २०७४ को दफा १८२ अनुसार ‘हेलचेक्र्याईं गरी ज्यान मार्ने’ कसुरमा संलग्न भएको उल्लेख गरिएको छ। उक्त कसुरमा दोषी ठहरिएमा तीन वर्षसम्म कैद र ३० हजार रुपैयाँसम्म जरिवाना हुन सक्ने कानुनी व्यवस्था छ।
नवनियुक्त प्रधानमन्त्री बालेन्द्र शाह नेतृत्वको मन्त्रिपरिषद् बैठकले आयोगको प्रतिवेदन कार्यान्वयन गर्ने निर्णय गरेसँगै गृहमन्त्री सुदन गुरुङले अनुसन्धान अघि बढाउन प्रहरीलाई निर्देशन दिएका थिए।
प्रहरी स्रोतका अनुसार पीडित परिवारले दिएको जाहेरीका आधारमा ओली र लेखकलाई पक्राउ गरिएको हो। उनीहरूलाई आवश्यक कानुनी प्रक्रिया पूरा गरी २४ घण्टाभित्र जिल्ला अदालत काठमाडौँमा उपस्थित गराइने तयारी गरिएको छ।
यस घटनापछि राजनीतिक वृत्तमा बहस सुरु भएको छ। पूर्वगृहमन्त्री लेखकले आफूलाई प्रतिशोधपूर्ण ढंगले पक्राउ गरिएको आरोप लगाउँदै राजनीतिक र कानुनी रूपमा लड्ने बताएका छन्। यता गृहमन्त्री सुदन गुरुङले भने “कानुनभन्दा माथि कोही नहुने” उल्लेख गर्दै यो कदम प्रतिशोध नभई न्यायको सुरुवात भएको बताएका छन्।
संविधानविद् निलाम्बर आचार्यले यस्तो घटनाले प्रतिशोध र धरपकडको सन्देश दिने भन्दै सावधानी अपनाउनुपर्ने टिप्पणी गरेका छन्।नेपालको राजनीतिक इतिहासमा पूर्वप्रधानमन्त्रीलाई ज्यानसम्बन्धी फौजदारी मुद्दामा पक्राउ गरिएको यो पहिलो घटना मानिएको छ।
