खानीमा पहिरो खस्दा सात जनाको मृत्यु

एजेन्सी । दक्षिणी फिलिपिन्सको खानीमा पहिरो खस्दा सात जनाको मृत्यु भएको छ । डाभाओ डे ओरो प्रान्तको एउटा गाउँमा बिहीवार पहिरो खस्दा कम्तिमा सात जनाको मृत्यु हुनुका साथै चार जना बेपत्ता भएका हुन । उद्धारकर्ताहरूले मृतकको शव निकालेका छन् ।

राष्ट्रिय प्रकोप जोखिम न्युनिकरण तथा व्यवस्थापन परिषद्ले मिन्डानाओ टापुको डाभाओ क्षेत्रका चार प्रान्तमा भारी वर्षाका कारण झन्डै ४५ हजार परिवार वा १ लाख ८७ हजारभन्दा बढी मानिस बाढी र पहिरोबाट प्रभावित भएको जनाएको छ ।

भारी वर्षा जारी रहेको र यस क्षेत्रका धेरै ठाउँमा बाढीको खतरा रहेको नागरिक रक्षा कार्यालयका क्षेत्रीय निर्देशक एडनार दयाङहिराङले जानकारी दिए । पहिरोले घर पुरिँदा पाँच बालबालिका र दुई वयस्कको मृत्यु भएको र एक वर्षीय बालकसहित दुई जना गम्भीर घाइते भएका छन् ।