- ३० भाद्र २०८३, मंगलवार / Sep 15, 2026
काठमाण्डौ, २८ बैशाख । देशभरको मौसममा आज विविधता देखिएको छ। जल तथा मौसम पूर्वानुमान महाशाखाले सुदूरपश्चिम, कर्णाली, लुम्बिनी र गण्डकी प्रदेशका पहाडी क्षेत्रहरूमा मेघगर्जन र चट्याङ्गसहित हल्कादेखि मध्यम वर्षा हुने सम्भावना जनाएको छ। साथै, कोशी र बागमती प्रदेशका पहाडी भूभागहरूमा पनि हल्का वर्षा हुने संकेत गरिएको छ।
मौसमविद् डेभिड ढकालका अनुसार, दिउँसोतिर काठमाडौं उपत्यकामा पनि छिटपुट वर्षा हुन सक्ने अनुमान गरिएको छ। अर्कोतर्फ, मधेस प्रदेशका केही स्थानहरूमा हावाहुरी चल्ने सम्भावना रहेको जनाइएको छ।
तराई–मधेस क्षेत्रहरूमा गर्मी थप बढेको छ। भैरहवामा हिजो देशकै उच्चतम तापक्रम ४१.५ डिग्री सेल्सियस मापन गरिएको थियो। आजको तापक्रम यसभन्दा केही कम हुने अनुमान गरिएको छ। काठमाडौं उपत्यकामा हिजो ३१.६ डिग्री सेल्सियस तापक्रम मापन भएको थियो र आज पनि ३० देखि ३२ डिग्रीको बीचमा तापक्रम रहने सम्भावना छ।
महाशाखाका अनुसार हाल पश्चिमी वायु, स्थानीय वायुसँगै अरब सागरबाट आइरहेको जलवाष्पयुक्त हावाको प्रभाव देशभर परेको छ। साथै, हिमाली केही भागहरूमा हल्का हिमपातको सम्भावना पनि जनाइएको छ। वर्षा र हावाहुरीको सम्भावनालाई ध्यानमा राख्दै महाशाखाले नागरिकहरूलाई आवश्यक सतर्कता अपनाउन अनुरोध गरेको छ।
