सम्मानित भएकाहरु विदेशतिर गए

गुणस्तरमा ध्यान गएन सम्मानित त भए
सम्मानित भएकाहरु विदेशतिर गए

हजारौं विद्यार्थी युवा, दैनिक विदेशतिर
कुन बुद्धिमा खिया लाग्यो, नझुकेको शिर ?
ईराकमा मरेका लाशको, आँसु पुछिएन
नेपाली विदेशमा किन अझै बुझिएन

केही नेपाली रुस-युक्रेन केही गाँजामा मरे
कश्मीर युद्ध हुँदा पनि, नेपाली नै परे
कालापानी,लिपु लेक र सिमानका बासी
भोक, निन्द्रा, खुशी छैन, रोटी खान्छन् खोसी

रोग,भोक, चिन्ता,डर,त्रासमा जनता परे जालमा
नेपालीको जीवन वित्यो दु:ख आँसुको तालमा
बाढी, पहिरो, हावा हुरी पलपलमा भुइँचालो
मलमपट्टी नपाई रुन्छन्,घाउँ देखिन्छ आलो

स्वास्थ्य,शिक्षा कमजोर भयो,बेरोजगार बढ्दै छ
किसानले उत्पादन गर्छन्, मूल्य नाई सड्दैछ
करोडौं करछली हुन्छ, लाखौं हिनामिना
न्यायाधीशले विर्सिसके, उचित छिनोफाना

जग्गा बाँझो,खेत बाँझै छ, युवा जाँडको तलमा
ठूला माछा फुत्किजाने, सानै पर्ने जालमा
राजनीति बेमानी मात्र जालझेल र षड्यन्त्र
अर्कैले चलाईदिन लाग्यो राज्यको संयन्त्र

शैक्षिक संस्था होडबाजीमा कमाउदै रमाए
त्रिविले गिनिज बुकमा नाम समेत लेखाए
गुणस्तरमा घ्यान गएन,सम्मानीत त भए
सम्मानित भएकाहरु विदेशतिरै गए ।