प्राध्यापकले तलब नपाउँदा पठनपाठन ठप्प

मकवानपुर । मदन भण्डारी स्वास्थ्य विज्ञान प्रतिष्ठानका प्राध्यापकले तलब र भत्ता नपाएको विरोधमा १५ दिनदेखि पठनपाठन ठप्प पारेका छन् ।

बागमती प्रदेशको गौरवको आयोजनाका रूपमा रहेको मदन भण्डारी स्वास्थ्य विज्ञान प्रतिष्ठानका सेवारत २४ जना प्राध्यापकले चार महिनादेखि तलब र भत्तालगायतका अन्य सुविधा नपाएकोले पठनपाठन ठप्प पारेका हुन ।

प्रतिष्ठानमा गत कात्तिक २२ गतेदेखि पठनपाठन ठप्प छ । पठनपाठन पूर्णरूपमा ठप्प हुँदा विद्यार्थी मर्कामा परेका छन् । प्रदेश सरकारले छात्रवृत्तिबापतको रकम प्रतिष्ठानमा नपठाउँदा प्राध्यापकहरूको तलब भत्ताबापतको रकम भुक्तानी दिन समस्या भएको प्रतिष्ठानका शिक्षाध्यक्ष डा सुदर्शन शेरचनले बताए ।

प्रतिष्ठानले स्नातक तहको नर्सिङ, फार्मेसी, पब्लिक हेल्थ र ल्यावरोटरी विषयमा चिकित्सा शिक्षा आयोगले तोकेको कोटामा विद्यार्थी सहभागी गराएर अध्यापन गराइरहेको छ ।