दरबन्दी छ, स्वास्थ्यकर्मी छैनन्

गुल्मी । जिल्ला कारागार गुल्मीमा सिनियर अहेव दरबन्दी भए पनि दुई वर्षदेखि सो दरबन्दीमा स्वास्थ्यकर्मी नहुँदा समस्या भएको छ । लामो समयदेखि स्वास्थ्यकर्मीका रूपमा कार्यरत प्रकाशचन्द्र घिमिरे स्वास्थ्य मन्त्रालयमा काजमा रहँदा कैदीबन्दीका स्वास्थ्य समस्यास“गै कारागारसमेत संकटमा परेको छ । घिमिरे २०७७ जेठदेखि स्वास्थ्य मन्त्रालयमा छन् । जसले गर्दा कारागारका कैदीबन्दीलाई समस्या भएको हो ।

कारागारका सूचना अधिकारी सीता भण्डारीका अनुसार सुरक्षाकर्मीको सहयोगमा कैदीलाई अस्पतालसम्म लैजाने र ल्याउने गरिन्छ । यससम्बन्धमा सहायक प्रमुख जिल्ला अधिकारी हरिप्रसाद गैरेले काजमा रहेका स्वास्थ्यकर्मीलाई फिर्ता बोलाउने र नआए करारमा भए पनि स्वास्थ्यकर्मी नियुक्त गर्ने प्रतिक्रिया दिए । कारागारमा स्वास्थ्यकर्मी नहुने मात्र होइन, क्षमताभन्दा बढी कैदी हुँदा पनि समस्या भएको छ ।

२०२४ सालमा स्थापना हुँदा ‘ङ’ वर्गको मान्यता प्राप्त कारागारमा २० पुरुष र ५ महिलाको क्षमता छ । तर, अहिले ८० जना छन् । जसमध्ये ७३ पुरुष र ७ महिला रहेको भण्डारीले जानकारी दिइन् । कारागारमा पुरुषमध्ये ४५ कैदी र २८ थुनुवा छन् । त्यस्तै, महिलातर्फ ५ कैदी र २ थुनुवा छन् । सबैभन्दा बढी जबर्जस्ती करणी, कर्तव्य ज्यान, चोरी, ज्यान मार्ने उद्योग, सवारी ज्यान, बहुविवाह, सवारी ज्यानलगायत मुद्दाका कैदीबन्दी छन् । राजधानी दैनिकबाट…