- २४ जेष्ठ २०८३, आईतवार / Jun 7, 2026
सिराहा । सिराहाको दक्षिणी सीमावर्ती भगवानपुर गाउँपालिका– ३ मा शनिबार मध्यराति एक १७ वर्षीया दलित किशोरीमाथि बलात्कार प्रयास भएको छ । बलात्कार गर्ने सोही ठाउँका २३ वर्षीय युवक फरार भएका छन् । इलाका प्रहरी कार्यालय लहानका अनुसार पप्पु भनिने कन्हैया यादवले बलात्कार प्रयास गरेको जाहेरी परेको छ । इप्रका लहानका प्रमुख प्रहरी नायब उपरीक्षक डा. तपनकुमार दाहालले जाहेरी परेपछि किशोरीको स्वास्थ्य जाँच गरिएको बताए ।
‘शौच गर्न मध्यराति घरबाहिर गएका वेला २३ वर्षीय युवकले बलात्कारको प्रयास गरेको भनी पीडित परिवारले जाहेरी दिएको छ,’ डिएसपी दाहालले भने, ‘हामीले किशोरीको स्वास्थ्य जाँच गराएका छौँ, रिपोर्ट आएपछि आवश्यक प्रक्रिया अगाडि बढाउनेछौँ ।’ यादवले चार दिन पहिलेदेखि नै बलात्कार गर्ने धम्की दिएको किशोरीले बताएकी छिन् ।
परिवारका अनुसार घरपछाडि लुकेर बसेका यादवले किशोरीलाई लछारपछार गरी बलात्कारको प्रयास गरेका थिए । किशोरी चिच्याएपछि युवक भागेका थिए । त्यसपछि गाउँलेहरूले घरमा लुकेर बसेका युवकलाई पक्राउ गरी राति नै ठाढी चौकीका दुईजना प्रहरीलाई बुझाएका थिए । तर, युवकको घरका महिलाहरूले प्रहरीबाट खोसेर युवकलाई पुनः भगाएको स्थानीयले बताएका छन् । युवक भारतीय सीमातर्फ भागेका छन् । युवक भागेलगत्तै घरमा ताल्चा लगाएर महिलासहित परिवारका अन्य सदस्य पनि फरार भएका छन् ।
नयाँ पत्रिकाबाट…
