सिराज र सुभ्मन चल्दा गुजरातको तेस्रो जित

काठमाडौं । इन्डियन प्रिमियर लिग (आइपीएल) मा गुजरात टाइटन्सले सनराइजर्स हैदराबादलाई हराएको छ। गुजरातले हैदराबादलाई ७ विकेटले हराएको हो।बलिङतर्फ मोहम्मद सिराज र ब्याटिङतर्फ कप्तान सुभ्मन गिलको उत्कृष्ट प्रदर्शनले गुजरातले प्रतियोगितामा तेस्रो जित दर्ता गरेको छ। हैदराबादको घरेलु मैदान राजिव गान्धी इन्टरनेसनल स्टेडियममा टस हारेर ब्याटिङको निम्तो पाएको हैदराबादले १५२ रन बनायो। हैदराबादले दिएको १५३ रनको विजयी लक्ष्य पछाएको गुजरात टाइटन्सले १६.४ ओभरमा ३ विकेट गुमाउँदै लक्ष्य पूरा गर्‍यो।

गुजरातका लागि कप्तान सुभ्मन गिलले ६१ रनको अविजित अर्धशतकीय पारी खेले । उनले ४३ बलमा ९ चौका प्रहार गरे। ओपनर शाही सुदर्शन दोहोरो अंक बनाउन नसक्दै पेभेलियन फर्किदा सुभ्मनले क्रिज सम्हालेका थिए। जोश बटलर डकाउट भए। वासिङ्टन सुन्दरले ४९ रनको पारी खेले। सफरिन राउटरफोर्ड ३५ रनमा अभिजित रहे। हैदराबादका लागि मोहम्मद सामीले २ विकेट र कप्तान प्याट कमिन्सलाई १ विकेट लिए।पहिलो इनिङमा ब्याटिङ गरेको सनराइजर्स हैदराबादका लागि नितेश कुमार रेड्डीले सर्वाधिक ३१ रन बनाए।

उनले ३४ बलमा तीन चौका प्रहार गरे। ओपनिङमा आएका अभिषेक शर्माले १८ रन इशान किसनले १७, हेनरिच कालसेनले २७, अङ्कित बर्माले १८ र कप्तान प्याट कमिन्सले २२ रन बनाए।गुजरातका लागि बलिङतर्फ मोहम्मद सिराजले सर्वाधिक ४ विकेट लिए। प्रसिद्ध कृष्ण र साई किशोरले समान २-२ विकेट लिए।पाँचौँ खेल खेलेको सनराइजर्स हैदराबादले लगातार चार हार बेहोरेको हो। पहिलो खेलमा जित निकालेको हैदराबादले जितको लय समाउन सकेन। अङ्क तालिकामा हैदराबाद पुछारमा रहेको छ। गुजरातले चौथो खेल खेलेको थियो। पहिलो खेलमा हार बेहोरेको गुजरात त्यसपछि लगातार ३ जित दर्ता गर्दै अङ्क तालिकाको दोस्रो स्थानमा उक्लिएको छ।अन्नपूर्ण पोस्टबाट…