संवैधानिक निकायमा ५२ जनाको नियुक्ति बदरको माग गर्दै दायर​​​​​​​ मुद्दाको अब ‘निरन्तर सुनुवाइ’

काठमाडौं । सर्वोच्च अदालतले विभिन्न संवैधानिक निकायमा ५२ जनाको नियुक्ति बदरको माग गर्दै दायर रिट निवेदनमाथिको सुनुवाइ आइतबारदेखि लगातार गर्ने भएको छ । अधिवक्ता ओम प्रकाश अर्याल लगायतले दायर गरेको रिट निवेदन माथिको सुनुवाइ लगातार गरेर छिटो टुंगो लगाउने निर्णय सर्वोच्चले गरेको हो ।

सामान्यतः संवैधानिक इजलास बुधबार मात्र बस्ने गरेको छ । तर, आइतबारदेखि निरन्तर सुनुवाइ गरेर छिट्टै टुंग्याउने जानकारी पाएको अर्का रिट निवेदक वरिष्ठ अधिवक्ता दिनेश त्रिपाठीले बताए । यही निवेदनमाथिको सुनुवाइ यसअघि बुधबार मात्र पेसी तोक्ने गरिएको थियो । निवेदक पक्षका कानुन व्यवसायीको बहस सकिएकाले बुधबारदेखि सरकारी वकिलले पनि बहस सुरु गरेका छन् ।

२०७७ पुस १ गते दायर रिट निवेदनमाथिको सुनुवाइ धेरै नलम्ब्याउने उद्देश्यले आइतबारदेखि निरन्तर सुनुवाइ गर्न लागिएको जनाइएको छ । २०८० सालमा अग्राधिकार दिइएको यस मुद्दा पटक–पटक हेर्न नभ्याइने सूचीमा पर्दै आएको थियो ।

रिट दर्ता भएको चार वर्षपछि प्रधानन्यायाधीश प्रकाशमानसिंह राउत, न्यायाधीशहरू सपना प्रधान मल्ल, मनोजकुमार शर्मा, कुमार चुडाल र नहकुल सुवेदीको संवैधानिक इजलासमा पेसी परेको छ  । अन्नपुर्णपाेष्टबाट..