- १४ आश्विन २०८३, बुधबार / Sep 30, 2026
कञ्चनपुर, १४ असाेज । महाकाली नदीमा आएको बाढीले कञ्चनपुरको दोधारा–चाँदनी र भीमदत्तनगर जोड्ने झोलुङ्गे पुल भत्काएको छ । बुधबार बिहान नदीको बीच भागमा रहेको पिलर भत्किएपछि पुलको केही भाग नदीमा बगेको प्रहरीले जनाएको छ ।
प्रहरीका अनुसार दोधारा–चाँदनीतर्फको तेस्रो स्पानमा क्षति पुगेको हो । सुरुमा पुलको करिब ५–६ मिटर भाग माथि उठेपछि आवागमनमा समस्या भएको थियो । त्यसपछि पिलरसमेत भत्किएर पुलको भाग चुँडिएको प्रहरीले जनाएको छ ।
पुल भत्किएपछि उक्त मार्गमा आवतजावत पूर्ण रूपमा ठप्प भएको छ । करिब १ हजार ४५३ मिटर लामो यो झोलुङ्गे पुल दोधारा–चाँदनीका बासिन्दाका लागि लामो समयदेखि महत्वपूर्ण आवागमनको माध्यम रहँदै आएको थियो ।
महाकालीमाथि निर्माण गरिएको यो पुल केही वर्षदेखि जीर्ण अवस्थामा रहेको थियो । पछिल्लो समय दोधारा–चाँदनी र महेन्द्रनगर जोड्ने पक्की पुल निर्माण भएपछि झोलुङ्गे पुलको प्रयोग भने विगतको तुलनामा घटेको थियो । प्रहरी तथा सम्बन्धित निकायले पुलमा भएको क्षतिको थप विवरण संकलन गरिरहेका छन् ।
