- २ आश्विन २०८३, शुक्रबार / Sep 18, 2026
काठमाडौं । सुन प्रकरणमा पक्राउ परेका माओवादी केन्द्रका उपाध्यक्ष कृष्णबहादुर महरा र बाँसबारी छालाजुत्ता कारखानाको सरकारी जग्गा हडपेको आरोप लागेका कांग्रेस सांसद विनोद चौधरीको बयान लिने काम सकिएको छ ।
३३ किलो सुन काण्डमा पक्राउ परेका माओवादी केन्द्रका उपाध्यक्ष कृष्ण वहादुर महरा र बाँसवारी छालाजुत्ता कारखानाको १० रोपनी सरकारी जग्गा प्रकरणमा नेपाली कांग्रेसका सांसद एवं उद्योगीपति विनोद चौधरीसँग छुट्टा छुट्टै बयान लिएको जिल्ला सरकारी वकिल कार्यालयले जनाएको छ । चार दिनको म्याद थप गरेर बुधबार र विहिबार दुईदिन महराको र सांसद चौधरीको बयान लिइएको हो ।
बयानपछि सञ्चारकर्मीसँग संक्षिप्त प्रतिक्रिया दिदैं सांसद चौधरीले एउटा जिम्मेवार व्यक्ति, जिम्मेवार राजनीतिकर्मीको हैसियतमा कानुनलाई सघाउन बयानका लागि स्वयम् आफु कानुन समक्ष उपस्थित भएको बताए । चौधरीलाई आवश्यक परे जतिखेर पनि बयानका लागि बोलाइने जनाएको छ ।
म्याद सकिएसंगै थप अनुसन्धानको प्रक्रिया अगाडि बढाउन महरालाई जिल्ला अदालत समक्ष शुक्रबार हाजिर गराईने कार्यालयले जनाएको छ । सुन प्रकरणका आरोपी महरा र जग्गा प्रकरणका आरोपी चौधरीको बयान टुंग्गिएपनि अनुसन्धानको काम भने जारी रहेको जिल्ला न्यायाधीवक्ता खडिन्द्र राज कटुवालले बताएका छन् ।
