- ३० भाद्र २०८३, मंगलवार / Sep 15, 2026
काठमाडौं । राजनीतिक हस्तक्षेपका कारण रोकिएको अनुसन्धान फाइल अहिले फेरि अघि बढेको छ । सीआईबीले डेढ महिनाअघि बाँसबारी जग्गा अनियमितताको फाइलमा हात हालेर अनुसन्धानका क्रममा चौधरी समूहलाई तानेको छ । कांग्रेस सांसद विनोद चौधरीसँग सीआईबीले बिहीबार बयान पनि लिएको छ ।
विनोदका माहिला भाइ बसन्त चौधरीसँग पनि सीआईबीले बयान लिइसकेको छ । कान्छा भाइ अरुण चौधरी त पक्राउ नै परेका थिए । तर जिल्ला अदालतको आदेशपछि अरुण हाजिर जमानीमा रिहा भए । सरकारले २०२२ सालमा दर्ता गरेको उद्योग हो बाँसबारी छालाजुत्ता कारखाना । २०४२ सालमा ‘च्याम्पियन फुट वयेर’ नामको चौधरी समूहले नयाँ उद्योग खोल्यो ।
चौधरी समूहले बाँसबारीका सञ्चालकलाई प्रभावित पारेर सरकारी जग्गामा अर्को जुत्ता उद्योग खोल्ने प्रस्ताव गरेर सम्झौता गर्यो । च्याम्पियन फुट वेयरले बाँसबारीको १० रोपनी जग्गा आफ्नो नाममा ल्यायो । पछि च्याम्पियनमा रहेको बाँसबारीको शेयर पनि चौधरी समूहका अरुणकुमार चौधरीले किने । त्यसपछि च्याम्पियन पूर्णरूपमा चौधरी समूहले कब्जा जमायो ।
१८ रोपनी जग्गा हस्तान्तरण गर्ने सम्झौता भएपनि १० रोपनी जग्गामात्रै नामसारी भयो, स्थानीयले आन्दोलन र विरोध गरेका कारण ८ रोपनी जग्गा चौधरी समूहले नामसारी गर्न पाएन । त्यो जग्गामा हाल फुटबल मैदान बनेको छ ।
