- ३१ असार २०८३, बुधबार / Jul 15, 2026
भक्तपुर । भक्तपुर नगरपालिका प्रमुख सुनिल प्रजापतिले देशलाई आत्मनिर्भर बनाउँनु पर्ने बताएका छन् । बाराही बचत तथा ऋण सहकारी संस्था लि. को २३ औं स्थापना दिवसको अवसरमा उक्त कुरा बताएका हुन् ।
अमेरिकी आर्थिक सहायता परियोजना मिलेनियम च्यालेन्ज कर्पोरेशन एमसीसी सम्झौताका बुँदाहरु राष्ट्रघाती रहेको बताउँद एमसीसी सम्झौता प्रतिनिधिसभाबाट अनुमोदन गर्न शासक दलहरुले जनतालाई अनेक छलछाम गरिरहेको गरेको बताए ।
भक्तपुर नपाले शिक्षा, स्वास्थ्य, सम्पदा संरक्षण, सरसफाईलगायतका क्षेत्रमा गरिरहेको उदाहरणीय काम गर्दै प्रमुख प्रजापतिले देशलाई आत्मनिर्भर बनाउने उद्देश्यका साथ भक्तपुर नपाले आफ्ना गतिविधिहरुलाई अगाडि बढाइरहेको जानकारी दिए ।
त्यसैगरी प्रमुख प्रजापतिले कोभिड महामारीको समयमा ख्वप अस्पतालमा अक्सिजन प्लान्ट स्थापना गर्न भक्तपुर नपाभित्र सञ्चालित सहकारी संस्थाले गरेको सहयोग अमूल्य भएको बताए । सहकारी संस्थाले नाफा–नोक्सानलाई भन्दा सामूहिक हितका कामहरुमा जोड दिनुपर्ने बताउदै सहकारी संस्थाहरु रकम लेनदेनमा मात्रै सीमित नरही संस्थामा जम्मा भएको पुँजीलाई रोजगारीमूलक उद्योग स्थापनातिर ध्यान दिनु आवश्यक भएको जोड दिए ।
भक्तपुर नगरपालिकाले नगरभित्र गैरकानुनी ढंगले सञ्चालित बहुउद्देश्यीय सहकारी संस्थाको अनुगमन र नियमनलाई गर्दै नपाबासीको बचत रकम सुरक्षित होस् भन्ने उद्देश्यले अनुगमनलाई तीव्र पारिरहेको जानकारी दिए ।
कार्यक्रममा भक्तपुर जिल्ला बचत तथा ऋण सहकारी संस्था लि. का अध्यक्ष कृष्णगोविन्द लाखाजुले प्रदेश सहकारी शाखामा दर्ता भएर आएका बहुउद्देशीय सहकारीहरु कानुनविपरीत सञ्चालनमा रहेको र त्यस्ता सहकारीहरुमा बचत नगर्न टोलटोलमा नागरिकहरुलाई सचेत पार्नुपर्ने बताए ।
त्यस्तै बाराही साकोसका सचिव राधेश्याम सुवालले संस्थाबाट सञ्चालित विविध गतिविधिहरुबारे अवगत गराउँदै संस्थाको विकास र प्रगति सदस्यहरुको हातमा हुने बताए ।
कार्यक्रममा बाराही साकोसले संस्थाका ७ जना बाल बचत कर्ता र ७ जना नियमित बचत कर्तालाई सम्मान गरेको थियो ।
