- २२ असार २०८३, सोमबार / Jul 6, 2026
काठमाडौं । प्रधानमन्त्री केपी शर्मा ओली नेतृत्वको सरकारले सय दिनको उपलब्धि सार्वजनिक गरिरहेकै बेला नेकपा माओवादी केन्द्रले आक्रामक शैलीमा राजधानीमा वृहत जनदवाव प्रदर्शन गर्न लागेको छ । बुधबार प्रेस सेन्टर नेपालको पदाधिकारीहरुसंगको छलफलमा नेकपा माओवादी केन्द्रका उपाध्यक्ष अग्नि सापकोटाले सरकारका जनविरोधी हर्कतका विरुद्ध खवरदारी सभा गर्न लागेको बताएका हुन ।
प्रेस सेन्टर नेपालका इन्चार्ज समेत रहेका उपाध्यक्ष सापकोटाले कातिक १० गते हुने प्रदर्शनका क्रममा सरकारले सय दिन भित्र के के उपलब्धि गरेको छ त्यसको राम्रोसंग जनताले त्यही दिन थाहा पाउने बताए । ओली नेतृत्वको सरकारले सय दिन पुगेलगत्तै गरेको सम्बोधन पछि प्रमुख प्रतिपक्ष दल माओवादी केन्द्रले आक्रामक रूपमा प्रस्तुत हुने नीति लिएको छ ।
यसअघि विपक्षी दलको तर्फबाट सरकारलाई ज्ञापनपत्र बुझाएको भन्दै सापकोटाले ती कुराको सुनुवाइ नभएको भन्दै सडक प्रदर्शन गर्न लागेको जिकिर गरे । उनले भने, “सरकार नाङगो रुपमा दलाल पुजिपती र दलालहरुको पक्षमा खुलेआम रुपमा लाग्यो । बिद्दुत प्राधिकरणले बक्यौता उठाउन खोज्दा रोक्ने, मीन बहादुर गुरुङ संग १० रोपनी जग्गा र भवन लिनेसम्मका कार्यले आफ्नो नाङ्गो रुप देखाएको छ ।
सरकारको सुशासन छरपस्ट भइसकेको छ ।” भ्रष्टाचारमा दोसी ठहर भएका ब्यक्ति भएकाले गुरुङबाट पार्टी कार्यालय नै जग्गासहित दान लिनुले सरकारको प्राथमिकता थाहा लागेको जिकिर गरे । प्रतिनिधि सभाको दुई ठूला दल मिलेपछि प्रतिपक्षीमा हुत्तिएको माओवादीले ओली सरकार असफल भएको निष्कर्ष निकालेको छ ।
