- २७ असार २०८३, शनिबार / Jul 11, 2026
काठमाडौं । मेची–महाकाली राष्ट्रिय उद्धार यात्राका क्रममा कोशी र मधेस प्रदेशबाट ८४ जना सडक मानवको उद्धार गरिएको छ । मानव सेवा आश्रम र आनी छोइङ डोल्मा फाउण्डेशनद्धारा अघि सारेको मेची–महाकाली राष्ट्रिय उद्धार यात्राको प्रधानमन्त्री केपी शर्मा ओलीले गत असोज २६ गते बालुवाटारबाट शुभारम्भ गरेका थिए ।
उद्धारकार्य असोज २८ गते मेचीपुलबाट थालनी गरिएको थियो । मेची–महाकाली राष्ट्रिय उद्धार यात्राको आठौँ दिन सोमबारसम्म आइपुग्दा कोशी र मधेस प्रदेशमा गरेर ८४ जना सडकमा आश्रित मानवको उद्धार गरेको मानव सेवा आश्रमका अध्यक्ष रामजी अधिकारीले बताए ।
कोशी र मधेस प्रदेशका उद्धार गरिएका सडकमा आश्रित मानवहरूलाई सरसफाइ र औषधोपचारपछि सोही प्रदेशमा रहेका मानव सेवा आश्रमका सेवा केन्द्रमा राखिएको जानकारी दिए । मानव सेवा आश्रम वीरगञ्जका अभिभावक परिवारका सहसंयोजक प्रकाश थारूले उद्धार यात्राअन्तर्गत सोमबार वीरगञ्जबाट सडकमा आश्रित तीन जनाको उद्धार गरिएको बताए ।
मानवसेवा आश्रमले सातै प्रदेशका १९ वटा जिल्लामा २५ वटा सेवा केन्द्र विस्तार गरेको छ । अहिले मानव सेवा आश्रममा एक हजार सात सय ९७ जनाले आश्रय लिइरहेका छन् । १२ वर्षको अवधिमा १० हजार चार सय ९७ जनाको उद्धार गरेको जनाएको छ ।
