- २३ बैशाख २०८३, बुधबार / May 6, 2026
बागमती प्रदेशमा मेडिकल माफियाको प्रभाव बढ्दै, इमानदार कर्मचारीहरू उनीहरूको दबाबमा त्रसित।
माफियाकाे आदेश नमान्ने कर्मचारीलाई मुद्दा मामिलामा तान्ने र सरुवा गर्ने र बढुवा रोक्ने धम्की।
युवाहरूले सरकार मौन बस्नु गलत भन्दै तत्काल कारबाहीको माग।
स्वास्थ्यजस्तो संवेदनशील क्षेत्रमा माफियाको पकड देशकै सुशासनका लागि खतरा भएकाे सरोकारवालाहरूको भनाइ ।
काठमाडौं, कार्तिक १५ । देशभर भू–माफियाको गतिविधि धेरै चर्चा हुने गर्थ्यो । तर अहिले मेडिकल माफियाले प्रशासनदेखि स्वास्थ्य क्षेत्रमा आफ्नो प्रभाव बढाउँदै लगेको युवाहरुको गुनासो बढ्दै गएको छ ।
राजधानीको एक चिया पसलमा जेनजी पुस्ताका युवाहरुबीच भएको छलफलमा उनीहरुले भने, “पहिले भू–माफियाको मात्रै कुरा सुन्थ्यौं, अहिले त सबैभन्दा खतरनाक मेडिकल माफिया हुन् । आफूहरुको आदेश नमान्ने कर्मचारीलाई दुःख दिने, सरुवा गर्ने र मुद्दा मामिलामा तान्ने काम ती माफियाले गर्दै आएका छन् ।”
युवाहरुका अनुसार यस्तो प्रवृत्तिमा सरकारको ध्यान पुग्न जरुरी छ । उनीहरु भन्छन्, “कर्मचारीले नियम अनुसार काम गर्दा पनि माफियाको दबाबमा पर्नुपरेको छ । सरकारले यस्ता माफियामाथि तत्काल कारबाही नगरे कसले गर्ने ?” भन्दै प्रश्न गरे ।
चियाको अर्को टेबलमा बसेका एक युवाले थपे, “यो समस्या सबैभन्दा बढी बागमती प्रदेशमा छ । त्यहाँका इमानदार कर्मचारीहरुलाई मेडिकल माफियाले दुःख दिइरहेका छन्, तर सरकार भने मौन छ । अब त्यस्ता माफियालाइ सबैले तह लगाउँनुपर्छ ।”
छलफलमा सहभागी अर्का युवाले भने, “सरकारले एक्सन लिनुपर्छ, राम्रो काम गर्ने कर्मचारीलाई दुःख दिने जो–कोहीलाई छोड्न हुँदैन । मन्त्रालयमा आफ्ना स्वार्थ मिल्ने विभिन्न महाशाखा प्रमुखहरू, शाखा प्रमुखहरू, विभिन्न तहका कर्मचारीहरुको सरुवा गराउन सक्ने, निर्णय प्रभावित पार्ने, र आफूविरुद्ध बोल्नेलाई तर्साउने माफियालाई मात्रै हाेइन जनताकाे काम नगर्ने कर्मचारीलाइ पनि तह लगाउन राज्यले पहल गर्नैपर्छ । हाेइन भने पछिल्लाे परिवर्तनकाे अर्थ छैन ”
स्थानीय प्रशासनका एक कर्मचारीका अनुसार पनि यस्ता माफियाहरुले कर्मचारी सरुवा–बढुवादेखि ठेक्का र नीतिगत निर्णयमा समेत हस्तक्षेप गर्ने गरेका छन् ।
नागरिक समाजका सरोकारवालाहरुले सरकारले बागमती प्रदेशसहित सबै तहमा यस्ता गैरकानुनी चलन नियन्त्रण गर्न ठोस कदम चाल्नुपर्ने माग गरेका छन् । “स्वास्थ्य क्षेत्र जस्तो संवेदनशील क्षेत्रमा माफियाको पकड रहिरहनु देशकै लागि खतरनाक संकेत हो ।” उनीहरुले भने ।
