सम्पत्ति शुद्धीकरण मुद्दा : दीपक भट्टको ८औँ र शुलभ अग्रवालको ९औँ पटक म्याद थप

काठमाडौं, २५ जेठ । सम्पत्ति शुद्धीकरण (मनी लाउण्डरिङ) मुद्दामा पक्राउ परेका दीपक भट्ट र शुलभ अग्रवालको म्याद थप गरिएको छ।

विशेष अदालत प्रशासनका अनुसार दीपक भट्टको हकमा आठौँ पटक र शुलभ अग्रवालको हकमा नवौँ पटक म्याद थप गरिएको हो। अदालतले दुवै प्रतिवादीमाथि अनुसन्धानका लागि थप ३–३ दिनको म्याद अनुमति दिएको छ।

न्यायाधीशद्वय नारायण पौडेल र उमेश कोइरालाको इजलासले उक्त आदेश दिएको विशेष अदालतले जनाएको छ।

प्रहरीले उनीहरूमाथि सम्पत्ति शुद्धीकरण सम्बन्धी आरोपमा अनुसन्धान जारी राखेको छ। अनुसन्धान प्रक्रिया अझै नसकिएको भन्दै पटक–पटक म्याद थप हुँदै आएको हो।