- २२ श्रावण २०८३, शुक्रबार / Aug 7, 2026
मुख्य बुँदा
नारायणी क्षेत्रमा ४२ प्रजातिका १२,८८७ चरा भेटिए
अघिल्लो वर्षभन्दा प्रजाति र सङ्ख्या दुवै बढ्यो
पाँच समूह बनाएर चरा गणना
पाहुना चरामध्ये खोया हाँस सबैभन्दा धेरै
नेपालमा ९०३ प्रजातिका पक्षी सूचीकृत
जलपक्षीका लागि नारायणी महत्वपूर्ण क्षेत्र
चितवन, माघ ६ । यस वर्षको जलपक्षी गणनाका क्रममा नारायणी नदी क्षेत्रमा ४२ प्रजातिका चरा भेटिएका छन् । चितवन राष्ट्रिय निकुञ्ज पश्चिम सेक्टरका पक्षी गणना संयोजक डिबी चौधरीले यस वर्ष नारायणी नदी क्षेत्रमा ४२ प्रजातिका चरा भेटिएको जानकारी दिनुभयो ।
अघिल्लो वर्षको पक्षी गणनामा ४१ प्रजातिका पक्षी भेटिएका थिए, यसपालिको गणनामा नारायणी नदी क्षेत्रमा चराको सङ्ख्या र प्रजाति बढेको हो ।
नारायणी नदी र आसपासका क्षेत्रमा विज्ञ समूहले गरेको चरा गणनाको एकीकृत तथ्याङ्कअनुसार यस वर्ष नारायणी क्षेत्रमा ४२ प्रजातिका १२ हजार ८ सय ८७ चरा भेटिएको संयोजक चौधरीले जानकारी दिनुभयो । पोहोर ४१ प्रजातिका ९ हजार ५ सय ४८ र सन् २०२४ मा ४१ प्रजातिका १० हजार २ सय ५७ चरा गणना गरिएको थियो ।
यस वर्ष थप एक प्रजातिको चरा भेटिएको छ भने सङ्ख्या धेरै देखिएको छ । नेपालमा ९ सय ३ प्रजातिका पक्षी सुचीकृत भएका छन् । तीमध्ये जल क्षेत्रमा १ सय ६२ प्रजातिका चरा पाइन्छन् ।
नवलपरासी ९बर्दघाट सुस्तापूर्व०तर्फको चितवन राष्ट्रिय निकुञ्ज र नारायणी नदी तथा सिमसार क्षेत्रमा पाँच समूह बनाएर चरा गणना गरिएको थियो । संयोजक चौधरीका अनुसार साइबेरियालगायत उत्तरी गोलार्द्धबाट चिसो छल्न आउने पाहुना चरामध्ये यस वर्ष सबैभन्दा बढी सङ्ख्यामा खोया हाँस देखिएका छन् । रासस
