- २२ श्रावण २०८३, शुक्रबार / Aug 7, 2026
ब्रसेल्स, माघ ६ । ग्रीनल्याण्ड विवादका कारण युरोपेली देशमाथि अतिरिक्त कर लगाउने अमेरिकी राष्ट्रपति डोनाल्ड ट्रम्पको चेतावनीपछि युरोपेली सङ्घ (ईयू)ले तनाव नबढाई वार्ताबाटै समाधान खोज्न चाहेको बताएको छ ।
राष्ट्रपति ट्रम्पले शनिबार ईयू सदस्य राष्ट्रहरू डेनमार्क, फिनल्याण्ड, फ्रान्स, जर्मनी, नेदरल्यान्ड्स, स्वीडेन तथा गैरसदस्य बेलायत र नर्वेलाई ग्रीनल्याण्ड अमेरिकालाई हस्तान्तरण नगरेसम्म थप कर लगाउने चेतावनी दिनुभएको थियो ।
यसपछि २७ देश सम्मिलित ईयूका नेताहरूले आउँदो बिहीबार ब्रसेल्समा आपतकालीन शिखर सम्मेलन आयोजना गर्ने भएका छन् । ट्रान्सएटलान्टिक सम्बन्धलाई असर पार्ने पछिल्ला वर्षकै गम्भीर सङ्कटबारे छलफल हुने अन्तर्राष्ट्रिय समाचार संस्था एएफपीले जनाएको छ ।
ईयूका व्यापार प्रवक्ता ओलोफ गिलले प्राथमिकता तनाव बढाउनु नभई वार्ता र छलफलमार्फत समाधान निकाल्नु रहेको बताउनुभएको छ । उहाँका अनुसार अमेरिकासँग सबै तहमा संवाद जारी रहेको छ ।
तर राष्ट्रपति ट्रम्प आफ्नो अडानबाट पछि नहटे ईयूले विभिन्न प्रतिकारात्मक उपाय अपनाउने तयारी पनि गरिरहेको छ । पहिलो उपायअन्तर्गत गत वर्ष अमेरिकासँग भएको वर्तमान करसम्बन्धी सम्झौता अघि नबढाइनेछ ।
दोस्रो उपायमा अमेरिकाबाट ईयूमा आयात हुने ९३ अर्ब युरो अर्थात् १ सय ८ अर्ब अमेरिकी डलर बराबरको सामानमा युरोपेली कर लगाइने सम्भावना छ । यो व्यवस्था अहिले फेब्रुअरीको सुरुसम्मका लागि रोकिएको छ ।
यदि स्थिति यथावत् रह्यो भने तेस्रो चरणमा ‘बाजुका’ भनेर चिनिने ‘एन्टी–कोर्सियन इन्स्ट्रुमेन्ट’ प्रयोगसहित थप कडा कदम चालिने ईयूको तयारी रहेको जनाइएको छ ।
