- ५ असार २०८३, शुक्रबार / Jun 19, 2026
राष्ट्रिय परिचयपत्र अब नागरिकले आफैँ डाउनलोड गर्न सक्ने।
सेवा राष्ट्रिय परिचयपत्र तथा पञ्जीकरण विभागले परीक्षणका रूपमा सुरु गर्यो।
वेबसाइटमार्फत QR कोडसहित कार्ड उपलब्ध हुने।
नाम, जन्म मिति र नागरिकता विवरण आवश्यक पर्ने।
QR कोड स्क्यान गरेर विवरण रुजु गर्न सकिने।
सेवा प्रणालीलाई डिजिटल र सुरक्षित बनाउने उद्देश्य।
काठमाडौं, ५ जेठ । सरकारले राष्ट्रिय परिचयपत्र सम्बन्धित व्यक्तिले आफैँ डाउनलोड गर्न सक्ने सेवा सुरु गरेको छ। राष्ट्रिय परिचयपत्र तथा पञ्जीकरण विभागले हिजोदेखि यो सेवा परीक्षणका रूपमा सञ्चालनमा ल्याएको हो।
विभागका अनुसार अब नागरिकले विभागको आधिकारिक वेबसाइटमार्फत फोटो र अनलाइन भेरिफिकेसनसहितको QR कोडयुक्त राष्ट्रिय परिचयपत्र कार्ड डाउनलोड गर्न सक्नेछन्।
राष्ट्रिय परिचयपत्र नम्बर प्राप्त गरेका नागरिकले आफ्नो नाम (नेपाली वा अंग्रेजी), जन्म मिति र नागरिकता जारी मिति प्रविष्ट गरेर कार्ड डाउनलोड गर्न सक्ने व्यवस्था गरिएको छ।
विभागले यस सेवाले सेवा प्रवाहलाई अझ सहज, छरितो र डिजिटल बनाउने अपेक्षा गरेको छ। साथै, सार्वजनिक निकाय तथा संस्थाहरूले अब QR कोड स्क्यान गरेर परिचयपत्रको विवरण रुजु गरी सेवा प्रदान गर्न सक्ने व्यवस्था गरिएको छ।
यसअघि विभागको प्रणालीबाट प्रिन्ट गरिएको परिचयपत्र नम्बरको निस्सा आधारमा सेवा दिइँदै आएकोमा अब डिजिटल QR प्रणालीमार्फत थप सुरक्षित र प्रमाणित सेवा उपलब्ध हुने विभागले जनाएको छ।
