- ११ भाद्र २०८३, बिहीबार / Aug 27, 2026
काठमाडौं, ११ भदौ । रसुवा, नुवाकोट र धादिङमा भोटेकोशी नदीमा आएको भीषण बाढीबाट भएको जनधनको क्षतिप्रति नेपाल मजदुर किसान पार्टी (नेमकिपा) ले दुःख व्यक्त गरेको छ।
नेमकिपाका केन्द्रीय समिति सदस्य तथा बागमती प्रदेशसभा संसदीय दलका नेता सुरेन्द्रराज गोसाईंले जारी गरेको प्रेस वक्तव्यमार्फत बाढी तथा डुबानमा परेकाको तत्काल खोजी, उद्धार, राहत, पुनःस्थापना तथा घाइतेको उचित उपचारको व्यवस्था गर्न सरकारको ध्यानाकर्षण गराइएको हाे ।
विपद्को समयमा सबै नेपाली एकजुट भएर उद्धार, राहत र पुनःस्थापनामा लाग्नुपर्नेमा जोड दिँदै नेमकिपाले प्रभावित क्षेत्रमा स्वास्थ्य टोली परिचालन गरी आवश्यक स्वास्थ्य सामग्री उपलब्ध गराउन सरकारसँग माग गरेको छ।
पार्टीले बाढीबाट ज्यान गुमाएका नेपाली तथा विदेशी नागरिकप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको छ। वक्तव्यमा प्राकृतिक विपद्को पूर्वसूचना प्रणाली निर्माणका लागि छिमेकी देश चीनसँग समेत सहकार्य गर्न सरकारलाई आग्रह गरिएको छ।
उच्च जोखिममा रहेका क्षेत्रमा पुनः बाढी आउन सक्ने सम्भावनालाई ध्यानमा राख्दै आवश्यक सतर्कता अपनाउन पनि पार्टीले सुझाव दिएको छ। त्यस्तै, भविष्यमा बाढीबाट प्रभावित हुन सक्ने महाकाली, कर्णाली, कोशी, मेची लगायतका नदी किनारका बस्तीको अध्ययन गरी नागरिकलाई सुरक्षित स्थानमा स्थानान्तरण गर्ने वा अन्य उपयुक्त विकल्पको तयारी गर्न नेमकिपाले सरकारसँग माग गरेको छ।
