- २२ जेष्ठ २०८३, शुक्रबार / Jun 5, 2026
काठमाडौँको कुलेश्वर फलफूल बजारमा नेपाली आँपको आपूर्ति बढ्यो।
नेपाली आँप बजारमा आउन थालेपछि भारतीय आँपको माग घट्दै गएको।
बम्बई, माल्दा र दसहरी आँप विभिन्न मूल्यमा बिक्री भइरहेको।
२२ केजी क्रेटको आँप १४०० देखि १७०० रुपैयाँसम्ममा कारोबार।
आगामी दिनमा बजार थप आँपले भरिने व्यापारीहरूको अनुमान।
काठमाण्डौ, २२ जेठ । काठमाडौँको कुलेश्वरस्थित फलफूल बजारमा तराईका विभिन्न जिल्लामा उत्पादित नेपाली आँप भित्रिन थालेपछि बजारमा चहलपहल बढेको छ। स्थानीय उत्पादनको आपूर्ति बढेसँगै भारतीय आँप क्रमशः बजारबाट विस्थापित हुन थालेको व्यापारीहरूले बताएका छन्।
व्यापारीहरूका अनुसार यस वर्ष नेपाली आँप समयमै बजारमा आउन थालेकाले उपभोक्ताले ताजा र स्थानीय उत्पादन रोज्न थालेका छन्। यसले भारतीय आँपको मागमा समेत कमी आएको उनीहरूको भनाइ छ।
हाल बजारमा नेपाली आँपको मूल्य जात, गुणस्तर र आकारअनुसार फरक–फरक रहेको छ। कुलेश्वर फलफूल बजारका अनुसार बम्बई आँप २२ केजीको क्रेट १ हजार ५ सयदेखि १ हजार ७ सय रुपैयाँसम्ममा बिक्री भइरहेको छ।
त्यसैगरी माल्दा आँप २२ केजीको १ हजार ४ सयदेखि १ हजार ६ सय रुपैयाँ र दसहरी आँप २१ केजीको १ हजार ५ सयदेखि १ हजार ६ सय रुपैयाँसम्ममा कारोबार भइरहेको छ।
नेपाली आँपको आपूर्ति बढेसँगै कुलेश्वर फलफूल बजार अहिले भरिभराउ देखिएको छ। व्यापारीहरूले आगामी दिनमा अझ धेरै परिमाणमा आँप भित्रिने र बजार पूर्ण रूपमा नेपाली आँपले नै भरिने अपेक्षा गरेका छन्।
