- ५ आश्विन २०८३, सोमबार / Sep 21, 2026
काठमाडौँ, २० साउन । भारतको बिहार राज्यस्थित सितामढीबाट मल खरिद गरेर फर्किने क्रममा पक्राउ परेका सर्लाहीका दुई नेपाली किसान भारतीय प्रहरीको हिरासतबाट रिहा भएका छन्।
सर्लाहीको बलरा नगरपालिका–५ का सुरेशप्रसाद सिंह र नागेन्द्रप्रसाद सिंहलाई एक महिनाअघि मल खरिद गरी नेपाल फर्किने क्रममा भारतीय प्रहरीले सीमा क्षेत्रबाट पक्राउ गरेको थियो।
सुरेशप्रसाद सिंहका छोरा अविनाश सिंहका अनुसार भारतीय अदालतले दुवै जनालाई जमानतमा रिहा गर्न आदेश दिएको छ। उनका अनुसार अदालतबाट रिहाइको आदेश यसअघि नै हुने अपेक्षा गरिए पनि सम्बन्धित न्यायाधीश बिदामा रहेकाले प्रक्रिया ढिलो भएको थियो।
अदालतले जमानतमा रिहा गर्न आदेश दिए पनि भारतीय कानुनी प्रक्रियाअनुसार स्थानीय एक जना भारतीय नागरिक साक्षी बसेपछि मात्रै उनीहरूलाई औपचारिक रूपमा घर फर्किन अनुमति दिइनेछ। आवश्यक प्रक्रिया पूरा भएपछि उनीहरू बिहीबार नेपाल फर्किने अपेक्षा गरिएको छ।
