- १९ कार्तिक २०८३, बिहीबार / Nov 5, 2026
गोरखा । सामागाउँलगायतका उच्च हिमाली क्षेत्रमा हिमपात भएको छ । चुम र नुब्री भ्याली आसपासका क्षेत्रमा सोमबारदेखि हिमपात भएको चुमनुब्री गाउँपालिकाका अध्यक्ष निमा लामाले बताए ।
चुम्चेत र छेकम्पार तथा नुब्री भ्यालीको ल्हो, प्रोक र सामागाउँलगायतका क्षेत्रमा हिउँ परेको हो । हिमपात सुरु भएसँगै दैनिक जनजीवन प्रभावित भएको छ । साम्दोका होटल व्यवसायी निमादोर्जे लामाका अनुसार गाईवस्तुलाई चराउन र घाँसपातका लागि समेत कठिनाइ हुन थालेको छ ।
अत्यधिक चिसोका कारण अहिले खानेपानीका मुहानमा पानी जम्न थालेपछि पानीको समस्या हुन थालेको छ । चिसोले वृद्धवृद्धा र बालबच्चालाई बढी समस्या भएको छ ।
साम्दो गाउँ समुद्री सतहबाट तीन हजार पाँच सय ५० मिटर उचाइमा पर्दछ । उच्च हिमाली क्षेत्र भएका कारण त्यहाँ अन्य क्षेत्रमा भन्दा बढी हिमपात हुने गर्दछ ।
