- २९ श्रावण २०८३, शुक्रबार / Aug 14, 2026
काठमाण्डौ । व्यापारीले प्याजको मूल्य आफू खुशी तोक्न थालेका छन् । बजारमा प्याजको अभाव भएसँगै प्याजको आयात ठप्प भएपछि बजारमा प्याजको भाउ व्यापारीले आफूखशी तोक्न थालेका हुन । भारतले गएको शनिवारदेखि निर्यातमा प्रतिबन्ध लगाएपछि फाइदा उठाउँदै केही व्यापारी र बिचौलियाले प्याजको कृत्रिम अभाव गर्न थालेका छन् ।
भारतले प्याज निर्यातमा प्रतिबन्ध लगाएपछि बजारमा अभाव भएको कालीमाटी तरकारी तथा फलफूल बजार विकास समितिले जनाएको छ । अहिले बजारमा प्याजको मूल्यमा एकरुपता छैन । उपभोक्ताले प्याज किलोमै १ सय ७० रुपैयाँसम्म तिर्ने गरेका छन् । थोक मूल्यमै प्याजको भाउ किलोको १५० रुपैयाँसम्म पुगेको छ ।
भारतले बेलाबेलामा प्रतिबन्ध लगाउँदा माग र आपूर्तिको फाइदा उठाउँदै बिचौलियाले चलखेल गर्ने गरेका छन् । नेपालमै उत्पादन हुने अनुकूल वातावरण भए पनि प्याजका लागि भारतकै भर पर्नु पर्ने अवस्था छ । बजारमा प्याज अभाव भएपछि चीनबाट ल्याउने तयारी भएको छ ।
केही व्यवसायीले चीनबाट प्याज ल्याउन अर्डर गरिसकेको बताएका छन् । प्याज उत्पादन बढाउन सरकारले ०६४ सालदेखि ०६९ सालसम्म सिरहा, सप्तरी, धनुषा, सर्लाही, बारा, पर्सा र रूपन्देहीमा प्याज मिसन कार्यक्रम सञ्चालन गरेको थियो । तर, प्याज खेतीको क्षेत्रफल र उत्पादन बढ्न सकेको छैन ।
