अत्यधिक चिसोका कारण पानी आपूर्ति प्रभावित

सोलुखुम्बु । सोलुखुम्बुको खुम्बु क्षेत्रमा पानी आपूर्तिमा समस्या भएको छ । चिसोका कारण पाइपमै पानी जम्न थालेपछि पानी आपूर्तीमा समस्या भएको हो । धारा तथा पाइपको पानी जम्दा दैनिकी कष्टकर बन्दै गएको छ । सडकमा तुसारो जमेको हुँदा दुर्घटनाको जोखिम समेत बढेकाले सजग भएर यातायातका साधन सञ्चालन गर्न अनुरोभ गरिएको छ ।

दिउँसो घाम लागेको समयमा समेत जमेको पानी नपग्लिँदा खुम्बुको विभिन्न ठाउँमा खानेपानी आपूर्ति बन्द भएको छ । खाने तेलदेखि घरभित्र भरेको पानी समेत जमेर ढिक्का जस्तै बन्ने गरेको स्थानीयको भनाई छ ।

यहाँ तापक्रम घटेर माइनस १३ डिग्री सेल्सियससम्म झर्ने गरेको छ । सदरमुकाम सल्लेरीसहितका क्षेत्रमा समेत बिहानको समयमा पानी आपूर्ति प्रभावित भइरहेको छ ।
अत्यधिक चिसोका कारण पाइपमै पानी जम्दा सगरमाथा क्षेत्रमा पिउने पानीको आपूर्ति प्रभावित भएको छ ।