- ५ असार २०८३, शुक्रबार / Jun 19, 2026
एजेन्सी, ७ भाद्र । पाकिस्तानमा ठूलो वर्षापछि आएको आकस्मिक बाढीमा २४ जनाले ज्यान गुमाएका छन् । पाकिस्तानको राष्ट्रिय विपद् व्यवस्थापन प्राधिकरण (एनडीएमए) का अनुसार मनसुनी वर्षाले जनधनमा ठूलो क्षति पुर्याउँदै कम्तीमा २४ जनाको ज्यान लिएको र पाँच जना घाइते भएको छ ।
उत्तरपश्चिम खैबर पख्तुनख्वा प्रान्तमा सबैभन्दा धेरै १४ बालबालिकासहित २१ जनाको ज्यान गएको विपद् अधिकारीलाई उद्धृत गर्दै चिनियाँ समाचार संस्था सिन्ह्वाले जनाएको छ । त्यस्तै, दक्षिणी सिन्ध प्रान्तमा दुई जना र कश्मीरमा एक जनाको मृत्यु भएको पुष्टि गरिएको छ ।
ठूलो वर्षापछि आएको आकस्मिक बाढीका कारण सयौँ परिवार विस्थापित भएका छन् । घर, सडक र कृषि क्षेत्र क्षतिग्रस्त बनेको समाचारमा उल्लेख छ ।
एनडीएमएका तथ्याङ्कअनुसार, यस वर्ष जुन महिनायता पाकिस्तानमा मौसमी वर्षाका कारण कम्तीमा ७७१ जनाले ज्यान गुमाइसकेका छन् । लगातारको वर्षा र बाढीका कारण थप मानवीय क्षति हुने जोखिम अझै कायम रहेको बताइएको छ ।
