- २३ बैशाख २०८३, बुधबार / May 6, 2026
एजेन्सी, १४ बैशाख । पाकिस्तानी प्रधानमन्त्री शहबाज सरिफ र इरानी राष्ट्रपति मसउद पेजेस्कियनबीच टेलिफोन वार्ता भएको छ । वार्ताका क्रममा दुवै नेताले क्षेत्रीय शान्ति र सुरक्षाका विषयमा छलफल गर्दै स्थायित्व कायम गर्न कूटनीतिक प्रयासलाई निरन्तरता दिने प्रतिबद्धता व्यक्त गरेका छन् ।
पाकिस्तानी प्रधानमन्त्री कार्यालयले जारी गरेको विज्ञप्तिमा उक्त जानकारी दिइएको हो । प्रधानमन्त्री सरिफले पाकिस्तान क्षेत्रीय शान्ति र सुरक्षाका लागि दृढ रूपमा प्रतिबद्ध रहेको उल्लेख गर्दै कूटनीतिक प्रयासहरू जारी रहने बताउनुभयो ।
संवादका क्रममा दुवै नेताले वर्तमान क्षेत्रीय अवस्था तथा शान्ति र स्थिरता प्रवर्द्धनका लागि भइरहेका प्रयासबारे विस्तृत विचार आदानप्रदान गरेका थिए । सरिफले हालै इस्लामाबादमा भएको इरानी प्रतिनिधिमण्डलको भ्रमणको प्रशंसा गर्नुभयो । साथै, इरानी विदेशमन्त्री सैयद अब्बास अराघची नेतृत्वको अर्को प्रतिनिधिमण्डलको हालैको भ्रमणलाई पनि स्वागत गर्नुभयो ।
उहाँले पछिल्ला दिनमा विभिन्न विश्व नेतासँग भएका कूटनीतिक प्रयासहरूबारे पनि जानकारी गराउनुभएको छ । ती प्रयासहरूले द्वन्द्वग्रस्त क्षेत्रमा स्थायी शान्तिका लागि वार्ता र कूटनीतिलाई बल पुर्याउने विश्वास व्यक्त गरिएको छ । आफ्नो तर्फबाट इरानी राष्ट्रपति पेजेस्कियनले क्षेत्रीय शान्ति प्रयासमा पाकिस्तानको भूमिकाको प्रशंसा गर्नुभएको विज्ञप्तिमा उल्लेख गरिएको छ ।
