- २७ श्रावण २०८३, बुधबार / Aug 12, 2026
काठमाडौं । पाकिस्तानले अफगानिस्तानभित्र सैन्य अभियान सञ्चालन गर्दै २९ जना आतंकवादी मारिएको दाबी गरेको छ। पाकिस्तान सरकारले गोप्य सूचनाका आधारमा मध्यराति उक्त कारबाही गरिएको जनाएको हो।
पाकिस्तानका सूचना तथा प्रसारण मन्त्री अत्ताउल्लाह तराडले सामाजिक सञ्जालमार्फत जारी गरेको वक्तव्यमा डुरान्ड रेखा नजिक स्थलगत अभियान सञ्चालन गरिएको र त्यसपछि जमात–उल–अहरार तथा पाकिस्तान तालिबान आन्दोलन (टीटीपी) का अड्डा र शिविरलाई लक्षित गरी हवाई आक्रमण गरिएको उल्लेख गरेका छन्।
तराडका अनुसार खैबर पख्तूनख्वाको बाजौर क्षेत्र केन्द्रित स्थलगत अभियानमा आतंकवादी कमाण्डर खान फ्रोश जबालसहित जमात–उल–अहरारका अन्य तीन जना सदस्य मारिएका छन्।
यता, अफगानिस्तानको तालिबान सरकारका प्रवक्ता जबीहुल्लाह मुजाहिदले भने आक्रमणमा सर्वसाधारणलाई निशाना बनाइएको आरोप लगाएका छन्। उनका अनुसार महिला र बालबालिकासहित दर्जनौँ नागरिकको मृत्यु भएको छ भने धेरै घाइते भएका छन्।
मुजाहिदले उक्त आक्रमणको कडा निन्दा गर्दै यसलाई ‘कायरतापूर्ण कार्य’को संज्ञा दिएका छन्।
घटनाबारे पाकिस्तान र अफगानिस्तानका पक्षबाट फरक–फरक दाबी सार्वजनिक भएपछि वास्तविक क्षतिको स्वतन्त्र पुष्टि हुन बाँकी रहेको छ।
