- १ कार्तिक २०८३, आईतवार / Oct 18, 2026
वीरगन्जबाट स्रोत नखुलेको ५२ लाख ५० हजार रुपैयाँ बरामद ।
नगदसहित चार जना पक्राउ ।
पक्राउ पर्नेमा एक भारतीय र तीन नेपाली नागरिक ।
दुईवटा मोटरसाइकलमा सवार उनीहरूलाई आदर्शनगरबाट पक्राउ गरिएको ।
५ सय र १ हजार रुपैयाँ दरका नोट बरामद ।
रकमको स्रोतबारे प्रहरीले अनुसन्धान गरिरहेको ।
पर्सा, २६ साउन । प्रहरीले स्रोत नखुलेको ५२ लाख ५० हजार रुपैयाँ नगदसहित पर्साको वीरगन्ज महानगरपालिकाबाट चार जनालाई पक्राउ गरेको छ । पक्राउ पर्नेमा तीन नेपाली र एक भारतीय नागरिक रहेका छन् ।
प्रहरीका अनुसार सोमबार साँझ वीरगन्ज महानगरपालिका–१० आदर्शनगरबाट दुईवटा मोटरसाइकलमा सवार उनीहरूलाई चेकजाँच गर्ने क्रममा ठूलो परिमाणमा स्रोत नखुलेको नगद फेला परेको हो ।
पक्राउ पर्नेमा भारतको सीतामढी घर भएका २६ वर्षीय सुरज कर्ण, बाराको प्रसौनी गाउँपालिका–१ का ३२ वर्षीय उपेन्द्र साह र सोही ठाउँका २६ वर्षीय सागरकुमार सर्राफ तथा पर्साको विन्दबासिनी गाउँपालिका–१ झौवागुठीका २५ वर्षीय राहुलकुमार गुप्ता रहेका छन् ।
पर्साका प्रहरी उपरीक्षक पवन भट्टराईका अनुसार उनीहरूबाट बरामद रकमको स्रोत खुल्न सकेको छैन । प्रहरीले रकमसहित चारै जनालाई नियन्त्रणमा लिएर अनुसन्धान अघि बढाएको छ ।
प्रहरीले सुरज कर्णको साथबाट १ लाख रुपैयाँ, उपेन्द्र साहको साथबाट १८ लाख १६ हजार रुपैयाँ, सागरकुमार सर्राफको साथबाट १८ लाख ३४ हजार रुपैयाँ र राहुलकुमार गुप्ताको साथबाट १६ लाख रुपैयाँ बरामद गरेको जनाएको छ ।
बरामद रकममा ५ सय र १ हजार रुपैयाँ दरका नोट रहेको प्रहरीले जनाएको छ । पक्राउ परेका चार जना प्रदेश २–०३–००३ प ७२१५ नम्बरको सुपर स्प्लेन्डर र ना. ५७ प ५१८२ नम्बरको एफजेड मोटरसाइकलमा सवार थिए । प्रहरीले बरामद रकमको स्रोत तथा घटनाको वास्तविकताबारे थप अनुसन्धान गरिरहेको जनाएको छ ।
