अतिरिक्त बोझ हुने पाठ्यपुस्तक प्रयोग नगर्न सरकारको कडा निर्देशन

काठमाडौँ, ८ बैशाख । शिक्षा तथा मानव स्रोत विकास केन्द्रले शैक्षिक सत्र २०८३ का लागि विद्यालयहरूलाई सरकारद्वारा स्वीकृत पाठ्यपुस्तक मात्र प्रयोग गर्न निर्देशन दिएको छ ।
केन्द्रले देशभरका ७७ वटै शिक्षा विकास तथा समन्वय एकाइहरूलाई पत्राचार गर्दै विद्यालय परिसरभित्र पोसाक, पाठ्यपुस्तक तथा स्टेशनरी सामग्री बिक्री वितरण नगर्न पनि स्पष्ट निर्देशन दिएको हो ।

जारी परिपत्रमा केही निजी प्रकाशकहरूले कानुन विपरीत उच्च मूल्य तोक्ने, न्यून गुणस्तरको कागज प्रयोग गर्ने तथा पाठ्यक्रम विकास केन्द्र बाट स्वीकृति नलिई पाठ्यपुस्तक बिक्री गर्ने गरेको गुनासो प्राप्त भएको उल्लेख गरिएको छ । सरकारको नीति तथा कानुन विपरीतका यस्ता गतिविधिले बालबालिका र अभिभावकमा अतिरिक्त आर्थिक बोझ थपिएको भन्दै केन्द्रले यस्ता कार्य तत्काल रोक्न निर्देशन दिएको हो ।

त्यस्तै, पछिल्लो समय केही विद्यालयहरूले आफ्नै परिसरभित्र पोसाक, पाठ्यपुस्तक तथा स्टेशनरी बिक्री गर्ने गरेको पाइएकाले सो कार्यसमेत तुरुन्त बन्द गर्न केन्द्रले आग्रह गरेको छ । केन्द्रले स्थानीय तहहरूसँग समन्वय गरी विद्यालयहरूमा आकस्मिक अनुगमन गर्न र नियम उल्लङ्घन गर्ने विद्यालय तथा प्रकाशकलाई कानुनी दायरामा ल्याई विवरण केन्द्रमा पठाउन निर्देशन दिएको छ ।